DNM ta join e wega mundial TAG you are it! Ban duna un aporte pa caba cu polucion di plastic en conexion cu Dia mundial di Medio Ambiente.

ORANJESTAD – Awe dia 5 di juni ta celebra Dia Mundial di Medio Ambiente. Meta di e dia aki ta pa trece conscientisacion mundial y tuma accion pa proteha nos medio ambiente. E lema pa 2018 ta: “caba cu polucion di plastic”. Paisnan miembro di United Nations ta haci nan aporte na esaki.
E idea ta cu cada un di nos por aporta n’e cabamento di e polucion di plastic. Con abo por contribui na esaki? Bo por reta bo mes y un persona pa nenga/stop e uzo di productonan cu ta cualifica como plastic desechabel como por ehempel pijp (straws), forki/cuchara/cuchieu di plastic, cups, saco di plastic, blet di feita desechabel, y bo mes por pensa cual productonan mas.
Directie Natuur en Milieu ta uni na e wega mundial” TAG you are it!”
Nos a traha un video cortico, no profesional, na unda nos ta tuma un decision firme pa reemplasa cupsnan di foam y plastic pa copinan di ceramica of travel mugs reusabel. Den e video DNM ta reta DOW, Santarosa y Serlimar pa nan tambe ‘Beat Plastic Pollution’. Pa wak esaki por bishita y like DNM su Facebook page dnmaruba. Abo tambe por mustra bo aporte positivo pa cu Dia Munidla di Medio Ambiente 2018.
Con pa haci esaki? Bo ta corda e wega di tik (abo te!). Tuma algun seconde uzando bo smart mobile phone y bo social media platform y uza e hashtag #BeatPlasticPollution y menciona @Dnmaruba @UNEnvironment.
Scoge e productonan cu ta cualifica como desechabel cu bo ta cla pa stop di uza awe;
Saca un selfie (potret of video) mustrando cual alternativa reusabel bo ta scoge
Comparti e selfie ariba e plataforma di social media y “TAG” 3 amigo/amiga, compania of persona di high profile pa challenge nan pa haci mescos dentro di 24 hrs.
Corda pa uza hashtag #BeatPlasticPollution y menciona @UNEnvironment y @dnmaruba
Esey e ta! Danki pa yuda cu e conscientisacion pa e movimento mundial pa caba cu polucion di plastic.
Feliz di mundial di Medio Ambiente!