Ora cu bo lesa e titulo di e comunicado di sra. Mervin Wyatt-Ras, esta cu “Minister President a gaña pueblo di Aruba”, di biaha bo ta pensa cu e parlamentario aki mester ta referi na e lider di AVP Mike Eman, ya cu tur hende na Aruba y rond mundo ta na altura caba con mentiroso sr. Eman tabata durante su gobernacion. Un y tur por corda ainda con entre otro el a gaña henter un pueblo cu e lo elimina BBO ‘from day one’ ora cu e drenta gobierno, cu e lo habri e refineria atrobe, cu e lo regala tur mucha di scol un laptop, cu e lo baha prijs di awa, coriente y gasolin, cu e lo introduci moratorio pa construccion di hotelnan etc.
Complice di desaster financiero
Pero den e caso aki sra. Wyatt-Ras ta sigui e malehempel di su lider bisando cu Premier Evelyn Wever-Croes a bay Hulanda pa logra haya 4 aña pa por cumpli cu e normanan di CAft, pero cu ta 2 aña so supuestamente e lo haya pa logra esaki. Echo ta cu e parlamentario aki mester tin berguensa pa haci un declaracion asina contra nos Prome Minister Evelyn Wever-Croes ya cu sra. Wyatt-Ras mes tabata complice di e desaster financiero cu su partido AVP a hinca nos pais aden. Echo ta cu den e situacion di e desaster financiero aki no ta rekeri 2 ni 4 aña pa logra cumpli cu e normanan di CAft, mirando con Gabinete Eman a gaña henter Reino Hulandes y CAft cu nan lo yega na un deficit di 25 miyon florin na 2017 y un surplus di 25 miyon florin na 2018. Sinembargo tur hende incluyendo sra. Wyatt-Ras por a mira kico tabata e resultado desastroso di nos finansa publico realisa den 8 aña di tempo. Danki na Gabinete Mike Eman cu e parlamentario aki a sostene ciegamente nos pais a ser confronta cu un deficit di 155 miyon florin na 2017 y un otro deficit den concepto di 275 miyon florin na 2018.
Deficit 2017 di 155 miyon florin
No mester lubida kico CAft a trece padilanti den su carta di 11 di mei 2018, relaciona cu e Conseho riba e presupuesto 2018. Den e carta aki un y tur por haya un bista con halto e deficit financiero pa 2017 a resulta y cual deficit ta cay completamente pa responsabilidad di e gobierno di AVP. Den un forma cla y raspa CAFT a conclui cu e deficit 2017 a yega te na -155 miyon florin! Mira tabel adhunto. Den e suma aki ta inclui tambe e fiesta riba e brug celebrando cumpleaños di Mike Eman y pa cual pueblo a paga mas di 140 mil florin. Sra. Wyatt-Ras tambe tabata presente na e fiesta aki pero awe ta come lubida con e tambe a djodjo riba custia di pueblo. E adagio di AVP semper ta: Nos ta gosa y pueblo ta paga!
Surplus na 2020
Ora cu sra. Wyatt-Ras ta papia di e cantidad di añanan cu Minister President Evelyn Wever-Croes no a logra haya for di Hulanda pa por cumpli cu e normanan di CAft, e parlamentario aki mester ta hopi bruha ya cu Hulanda a duna pais Aruba te cu aña 2020 e oportunidad pa logra yega na un presupuesto balansa. Y no tin duda cu tur e deficitnan di 2017 y 2018 ta danki na e maneho desastroso cu a ser hiba pa Gabinete Eman. Y na aña 2020 bao di Gabinete Wever-Croes nos pais lo bay conoce un surplus atrobe. Pues a tuma e gobierno actual di MEP-POR-RED hopi curashi y sabiduria pa logra toch na reduci e ultimo deficit 2018 laga atras pa Gabinete Eman, di un suma di 275 miyon florin te cu 150 miyon florin y e reduccionnan aki lo continua tambe den e añanan venidero.
Wyatt-Ras cu hopi rabia y zelos
Sin duda cu e hazaña aki di reduci e deficit 2018 cu 125 miyon florin, tambe e declaracion di Secretario di Estado Knops cu durante gobernacion di AVP e debe di Aruba a ser redobla di 40% pa rond di 90% y finalmente e elogio cu Secretario di Estado Knops a duna Prome Minister Evelyn Wever-Croes siman pasa bisando cu e cooperacion cu nos Premier ta excelente, tur esakinan no a cay den bon tera cerca sra. Wyatt-Ras y naturalmente rabia y zelos a dal su curpa pa e por skirbi tanto disparate asina. Ta p’esey partido MEP ta suplica sra. Wyatt-Ras pa kita su paña di combat, laga e zeelos un banda, para na banda y wak con e gobierno aki lo pone e situacion financiero den un estado manehabel atrobe. Skirbiendo y papiando disparate tur biaha no ta yuda nos pais na nada.