Parlamentario Alan Howell a presenta algun mocion al caso durante tratamento di presupuesto 2018 y unda e parti di San Nicolas a sobresali.
Un di nan ta relaciona cu construccion di un Centro Multifuncional pa San Nicolas.
El a indica cu e construccion di MFA na San Nicolas a cay na awa. Un investigacion realisa a mustra cu placa a wordo pidi pa 5 MFA, pero a bin resulta cu 4 so a wordo traha. Un investigacion mas profundo a demostra cu riba papel tin 3 miyon Florin pa un MFA na San Nicolas, pero e placa a desaparece. Buscando a bin haya 1 miyon so y pueblo di San Nicolas kier sa unda e resto di placa bay.
Howell ta imagina su mes caba cu lo scucha e storia di semper di ‘meerwerk’, pero tur hende sa caba cu esey ta e sistema mas facil pa horta e placa. “Pero cu Howell den Parlamento, por sigura cu e hortamento ey no ta bay facil, nos ta bay changanan di tur manera”.
San Nicolas kier su MFA, no ta importante si kier cambia nomber of no, contal cu e wordo habri. Pesey den nomber di pueblo di Aruba y en especial di e hendenan di pariba di brug, Alan Howell a entrega un mocion pa urgi Gobierno pa pone fondonan disponibel den prespuesto pa San Nicolas haya e mesun atencion cu e otro districtonan y por conta cu un Centro Multifuncional den e menor tempo posibel.
Den un reunion cu tabatin cu Prome Minister, el a sigura Parlamentario di POR y pueblo di San Nicolas cu lo busca fondo di unda cu ta pa asina San Nicolas tambe por haya su ‘fair share’ den esaki y Alan Howell ta gracidi Prome Minister p’esaki.
E otro mocion relaciona cu San Nicolas ta tocante e incentivonan fiscal cu mester a wordo elimina. Despues di a haci un investigacion intensivo unda cu oposicion kier a haci wega cu ta como sifuera e gobierno actual ta esun cu a kita esaki pasobra nan ta contra nos hendenan di San Nicolas, a bin resulta cu e conseho pa kita e incentivonan no a bin durante e gobernacion di Gabinete Wever-Croes, sino cu a drenta na october 2017 bou maneho di ex minister Bermudez. E luna ey mes ex minister Bermudez a duna conseho pa kita e incetivonan aki debi cu ta bay pugna cu leynan di GCG y si no a kitanan Aruba lo a bay riba blacklist.
Den e mocion ta urgi Gobierno pa sondea un otro tipo di incentivonan fiscal pa promove economia na San Nicolas. Esaki considerando e memorandium di 7 di februari 2018 di CBFZ dirigi na ex minister di Finansas Bermudez, cu e regimen fiscal di San Nicolas ehecuta door di Gobierno anterior tabatin un caracter discriminatorio, cu e regimen fiscal di San Nicoas tabata en pugna cu e Gedragscode Groep (GDG), cu directiva di DEMP y CBFZ a conseha ex minister Bermudez pa kita e regimen fiscal pa San Nicolas y cu si no kita e regimen fiscal 17 di November 2017, Aruba lo por a bay riba blacklist.
Alan Howell ta conta cu Gabinete Wever-Croes lo duna e atencion necesario na e economia di San Nicolas.