Sabana Basora Noord: Dialuna pa mas o menos 4’or di atardi, polis ta wordo manda cu urgencia na un adres na Sabana Basora Noord, pa un caso di tiramento.
Victima di e tiramento den auto
Na caminda nan ta topa cu un Nissan Tiida Blauw, den e auto tabata tin e victima di e tiramento, mesora a pidi pa ambulance busca e victima den e caminda un poco mas panort di Julennys. E victima tabata tin un tiro net bou di su ribchi banda drechi.
Aparentemente despues cu e persona a wordo tira, nan a pidi un bisiña pa hiba e victima Imsan. Na caminda polis a topanan y nan mester a warda riba e ambulance, cu hopi liher a yega na unda e auto tabata para. E victima a wordo transporta cu urgencia pa hospitaal.
Arma di candela confisca
Despues di un rato e polisnan na e cas Sabana Basora Noord 114 ta bin topa cu e arma di candela cu aparentemente lo a wordo usa pa tira e hoben. E arma mesora ta wordo confisca. Na prome instante a wordo bisa cu e victima lo a wordo tira pariba di Calidad Supermarket, pero esey no tabata e caso, e hoben a wordo tira den e cas na Sabana Basora Noord 114.
Team di recherche y varios unidad di polis na e cas haciendo investigacion
Team di recherche y varios unidad di polis a bay na e cas y a cuminsa cu un investigacion, recherche a bay cu un hoben cu tabata na e cas, mientras ta buscando e sospechoso principal di e tiramento aki. Segun nos a compronde na e sitio, cu e victima tabata na e adres aki, na momento cu un persona masculino a yega na e cas y a tire, aparentemente e persona aki despues di a tira e hoben lo a laga su arma cay y a bandona e sitio.
Polis a pidi pa presencia di slachtofferhulp pa asisti e habitantenan di e cas y tambe departamento tecnico di polis a bay na e adres pa haci mas investigacion.