E tema di refugiado ta un tema cu mester wordo atendi pa Reino Hulandes, pesey gobierno di Aruba hunto cu Hulanda, ta trahando riba un plan con lo bay atende cu e situacion di refugiadonan venezolano, na momento cu si esaki lo mester bira realidad.
Oranjestad, Aruba: Diahuebs mainta durante un conferencia di prensa, Prome Minister di Aruba Mr. Evelyn Wever Croes a aclarea puntonan cu ta regarda refugiadonan Venezolano.
En cuanto e informacion cu a sali Diamars ultimo, for di UNHCR cu ta e comision di Nacionnan Uni cu ta trata e tema di refugiado.
E prome informe cu a sali Diamars a causa hopi conmocion mundialmente, pero despues UNHCR a aclarea esaki, cu nan ta haci un peticion na cada pais cu ta trata of lo bay trata cu personanan cu lo sali for di Venezuela, ta pidi pa trata e personanan aki cu status di refugiado.
Alcontrario na e prome informacion cu tawata mustra mescos cu ta un instruccion nan lo a manda pa e paisnan aki, pero e di dos informe a suavisa esaki.
Gobierno di Aruba mesora a tuma contacto cu Reino, paso esaki ta un tema di relacionnan exterior, cu ta un materia cu ta regarda Reino Hulandes.
Hunto cu Reino a delinea e pasonan cu Gobierno di Aruba lo tin cu sigui.
E ultimo aclariacion cu a bin di Nacionnan Uni ,ta duna e paisnan cu ta ricibiendo personanan for di Venezuela, chens pa por pensa y prepara un maneho humanitario pa por yuda e personanan aki. No necesariamente sacanan for di bo pais y mandanan nan pais bek. Prome Minister a sigui bisa cu ta un momento cu nos tur a sinti cu lo yega un dia, no por bisa ainda si e dia a yega awor. No ta conoci si acaso manda e hendenan aki bek nan pais, si nan lo sobrevivi. Y como tratadonan internacional, e hende cu nos ta y e balornan Cristian cu nos tin, ta pone cu bo ta yuda bo prohimo.
A tene reunionnan ariba nivel di Reino y a pidi pa inventarisa kiko lo mester haci, pa si acaso por yega un dia cu Aruba mester cumpli cu e peticion aki.
Aruba ta den preparacion pa cualkier eventualidad.
Prome Minister Wever Croes a papia tambe di e situacion financiero di pais Aruba cu ta hopi malo, Aruba tin reto nan financiero hopi grandi y cu Aruba awor aki no por atende, acapara of carga e gastonan aki, si gobierno di Aruba so mester hacie, paso apenas por atende cu e gastonan cu tin di haci cu nos propio pais.
Den presupuesto 2018 Gobierno di Aruba a inclui loke Rampen Bureau/ Crisis Team a pidi, pa sikiera tin un Crisis Paraatheid Fonds, cu ta e suma di 2 miyon florin.
E suma aki ta pa si algo mester pasa, nan por actua di biaha, mester bisa si cu e suma aki ta solamente pa e prome prome auxilio cu lo mester wordo duna.
Awor cu e peticionnan a wordo haci door di Nacionnan Uni, gobierno ta bezig haciendo tur e calculacionnan kiko lo kiermen pa pais Aruba, momento cu bay duna e status di refugiado na tur e personanan cu ta sali for di Venezuela.
Y con ta bay paga pa e gastonan aki y ken ta bay paga panan.
Prome Minister a bisa tambe cu desde siman pasa a bin un cambio den e postura di Hulanda, unda cu ya caba nan ta mira cu lo ta algo cu nan tin cu bay yuda cune.
Minister di Defensie a priminti cu e lo yuda cu logisticanan, esta traslado, transporte.
Atraves di Hulanda, gobierno ta purbando pa haya e asistencia financiero di loke Aruba lo mester di bay haci.
UNHCR, e instancia cu e a emiti e notificacion aki tambe a ofrece pa cubri parti di e gastonan, naturalmente cu nan condicionnan.
Pues gobierno ta para awor akinan den e crisis financiero cu tin den nos pais, e problemanan financiero cu e gobierno actual a hereda di un Gobernacion financieramente hopi irresponsabel .
Prome Minister a bisa tambe cu a traha espacio pa e Crisis Paraatheids Fonds, pero ta pensa cu e suma aki lo no ta suficiente si pasa un crisis humanitario grandi na Venezuela.
Sinembargo e preparacionnan si ta na caminda pa wak cuanto e gastonan lo ta y pa asina presenta esaki na instancianan cu a ofrece nan asistencia financiero y logistica den esaki.