ORANJESTAD, Aruba – MetaCorp a comberti den un berdadero “partner strategico” di Fundacion Pa Nos Comunidad (FPNC), den nan esfuerso pa brinda sosten y ayudo na esunnan den mas necesidad actualmente dor di e pandemia. Eddie de Veer di MetaCorp tabata na Centro Kibrahacha pa entrega un cargacion grandi di productonan pa baby, un necesidad urgente pa e fundacion. FPNC tabatin falta di productonan di baby pa por yuda clientenan den necesidad.
E team di MetaCorp a sinta rapidamente y a tuma e decision di duna un man, asina Eddie de Veer a expresa. En bes di simplemente duna placa, a opta pa bay un paso mas leu y asina reduci e trabou cu e fundacion mes ta haci. “Nos a dicidi pa nos mes busca e articulonan”, asina Eddie de Veer a splica.
Haciendo esey no tabata un tarea facil, pa motibo cu tin diferente distribuido di diferente producto cu tin mester den e inventario pa clientenan. Lamentablemente a confronta limitacion di articulonan disponibel pa e compra grandi di MetaCorp. E agencianan a yuda y MetaCorp na final a aporta cu 15 mil florin na productonan pa baby.
Na momento cu Gianaika van der Biezen, Director di e fundacion, a menciona na MetaCorp cu nan tin necesidad di productonan pa baby of di mucha, mesora e compania cu ta celebrando 100 aña di existencia, a activa. A haci donacion di cuminda pa baby, pampers, wipes, lechi, productonan escencial cu un baby entre 0 pa 2 aña ta uza.
Ta estima cu 60% di esunnan registra na Fundacion pa nos Comunidad tin mucha den famia. E cantidad aki ta basta halto y p’esey e necesidad di productonan di mucha ta halto. “Un danki special na MetaCorp cu semper ta disponibel pa yuda nos den tur forma, den tur manera,” asina Gianaika van der Biezen a expresa. MetaCorp ta yuda distribui e paketenan y tambe ta yuda cu productonan pa haci famianan mas contento. E fundacion ta aprecia e tremendo gesto di MetaCorp.
Eddie de Veer a expresa cu nan compania ta solidario cu comunidad pasobra nan ta sigur cu despues di e crisis aki, cu manera semper, Aruba lo sali mas fuerte, mas solido y mas miho cu nunca!
