ORANJESTAD – Oficina di Turismo di Aruba (A.T.A.) ta anuncia cu e registracion pa tur sector cu ta forma parti di e Aruba Health and Happiness Code (HH Code) lo habri bek pa un siman pa compania y taxistanan cu no a registra ainda. A.T.A. conhuntamente cu Departamento di Salud Publico (D.V.G.) a lansa e programa di HH Code cu e meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba.
A.T.A. a introduci un total di 10 sector consistiendo di companianan cu lo mester completa e programa di HH Code, cu e meta final pa obtene e seyo di oro. E sectornan aki ta inclui ‘Accommodations’, ‘Food & Beverage’, ‘Food Trucks’, ‘Retail/Shops/Supermarkets’, ‘Tour Operators, ‘Car Rentals’, ‘Taxi’, ‘Spa & Salon’, ‘Watersports’ y ‘Casino. Pronto tambe lo introduci e sector di ‘Events’. E registracion pa e 10 sectornan cu ya a wordo introduci lo habri desde 1 di juli te cu 8 di juli.
Compania y taxistanan cu ya a registra y a haci esaki debidamente pa asina pasa e prome fase di e programa a ricibi un email confirmando esaki como tambe indicando e fecha riba cual por pasa busca e seyo di pre-check. Ta hasi un apelacion na tur compania y taxista cu a registra pa verifica si a ricibi e email aki, mirando cu esaki lo por a bay den ‘junk mail’.
Pa mas informacion tocante e HH Code y con pa registra por bishita www.arubacovid19.org/ahhc of por manda un email na [email protected].