ORANJESTAD, Diamars 16 di April 2024 a surgi un candela den motor RECIP #7 den planta di energia di WEB. No tawatin heridonan y e situacion di produccion di coriente pa awor ta bou di control, pero ainda delicado. E candela a wordo ocasiona pa un fayo di un pomp di combustibel di presion halto na un cilinder di e motor, cual a causa lek di combustibel.
WEB su personal di warda y di mantencion a detecta e candela y mesora a bati alarma. WET, e team di emergencia di WEB a acudi inmediatamente pa e prome asistencia. Na mes momento a yama Brandweer cu a yega na e sitio den no time.
E candela lo tabata dificil pa preveni, door cu tabata un fayo repentino di e pomp di combustibel di presion halto cu a wordo cambia algun dia atras pa un pomp cu a bin nobo di fabrica. A pidi un team di fabricante Wärtsilä pa haci un evaluacion di e daño y pa traha riba un recovery plan. Motor RECIP #7 pa awor ta for di servicio y ta calcula cu lo tuma mas o menos 6 luna pa e ta bek den operacion.
E suministro di coriente actual ta delicado caba door di e aumento enorme di demanda pa coriente cual a subi considerablemente e ultimo aña. Ademas nos ta drentando temporada di calor y e periodo di piek di uzo di coriente; Esaki ta haci cu e situacion por bira critico. E team di WEB Aruba ta haci su maximo esfuerso pa maneha e produccion y suministro di coriente mas mihor posibel, pa asina por satisface e demanda di comunidad pa coriente.
Gerencia di WEB ta manda un palabra grandi di gradicimento pa tur empleado cu a haci nan maximo esfuerso pa maneha e candela asina rapido. Tambe un palabra di danki ta bay pa Brandweer Aruba.
