Oranjestad, Aruba – 4 di april, 2024 – Ultimo simannan, e comunidad di San Nicolas por a nota varios trabounan di mantencion den diferente area rond di San Nicolas. ELMAR a lansa trabou acelera di mantencion na San Nicolas como parti di su plan di mantencion riba henter e isla. “Ya pa algun tempo, ELMAR ta ehecutando su plan acelera di mantencion cu tin un duracion di mas o menos 3 aña. Mantencion ta un parti esencial di e operacionnan di ELMAR, pa prolongando e bida di nos ekipo y pa garantisa e suministro di coriente pa nos comunidad.”, e Operations Manager di ELMAR, Albertico Koolman, ta menciona.
ELMAR ta realisa esfuersonan di mantencion riba Overhead Services y Underground Services. Overhead Services ta e red riba tera unda e trabounan ta ensera e reemplazo di palonan di coriente, liñanan di distribucion, y componente di coriente ariba e palonan. Alabes, tin esfuersonan bou di tera cu Underground Services cual ta ensera:
E reemplazo di componente di coriente den nos transformatorhuizen tur rond di Aruba
Trabou di mantencion riba e ekiponan grandi den nos 7 substacionnan rond di Aruba.
Aruba tin mas o menos 1,000 transformatorhuizen, cual 190 di nan ta situa na San Nicolas. ELMAR su Project Team conhuntamente cu su Team di Mantencion di Underground Services, a dicidi pa cuminsa e trabounan riba e transformatorhuizen for di p’ariba di brug, cuminsando cu San Nicolas, y gradualmente progresando pa p’abou di brug. E trayecto aki lo trece ELMAR door di Savaneta, despues Pos Chiquito, prome cu nan yega na e areanan p’abou di brug y continua na Playa.
Ademas di trabounan di mantencion, cada transformatorhuizen ta wordo ekipa cu Smart Meters. Esaki nifica cu den caso di cualkier interupcion den e grid di coriente, ELMAR lo wordo notifica automaticamente cu ta permiti nan pa tuma acionnan necesario.
“Mantencion ta cuminsa cu planificacion meticuloso. Desde mas cu un luna pasa, nos tecniconan di Kabelafdeling ta inspeccionando e transformatorhuizen den San Nicolas, identificando e areanan cu ta rekeri atencion. E trabou di mantencion den nos transformatorhuizen ta riba e instalacionnan di coriente di laagspannings pero tambe di hoogspanning. Alabes, ELMAR ta renoba componentenan manera ijzergas den e transformatorhuizen pa prolonga e bida di e infrastructura,” e Supervisor di Underground Services di ELMAR, Eurvin Goeloe, ta splica.
Nos trabounan di mantencion regular lo continua rond di nos isla, esaki ta inclui Overhead Services y Underground Services, ademas di e trabou accelera di mantencion na San Nicolas cu tin un team dedica. Continuamente nos ta realisa trabou di mantencion di Underground Services riba e ekiponan den nos 7 Substacionnan den e otro areanan. Y recientemente, nos a finalisa trabounan di mantencion di Overhead Services den areanan manera Bubali, Moko y Ayo.
“Prome cu un trabou di mantencion, nos ta analisa si e ta rekeri un interupcion di coriente. Den caso cu ta permiti, nos ta eherce e trabou di mantencion cu suministro di coriente riba liña, asina yama “hotwork”. Sinembargo, si e trabou di coriente ta rekeri un interupcion den e distrubcion di coriente, nos ta haci esaki pa safety di nos tecniconan y esnan den e area. Den caso di un interupcion di coriente debi na un trabou di mantencion, nos lo sigui distribui uitschakelberichten via social media, corant y radio pa informa e clientenan den e area, “ e PR di ELMAR, Audrey Croes, ta finalisa.
Pa keda informa tocante trabounan di mantencion binidero cu ta rekeri un interupcion di coriente, bishita e website di ELMAR na www.elmar.aw y sigui na e seccion di Planned Maintenance Work.
