Home » Cas Veneranda pronto bek den su gloria

Cas Veneranda pronto bek den su gloria

by Admin
0 comment 92 views

 

 

Diamars 12 di maart, Stichting Monumentenfonds Aruba (SMFA) den presencia di Minister di Economia, Comunicacion y Desaroyo Sostenibel, Geoffrey Wever y Minister di Finansas  y  Cultura, Xiomara Maduro, partnernan di proyecto y demas invitadonan a duna inicio oficial na e proyecto di restauracion di Cas Veneranda.

Despues di cu aña pasa SMFA a anuncia cu a yega na un acuerdo di compra cu e herederonan di Federico Maximiliaan (Machi) y Maria Veneranda Arends, SMFA, den presencia di notario Mr. Michelle Gomes di Notariskantoor Mr. M.J.G. Tromp a firma e acta oficial di traspaso di Cas Veneranda cu representantenan di famia Arends. Tambe a haci entrega oficial di e “yabi” di Cas Veneranda na presidente di SMFA, Rousanne de Weever.

Alabes a firma e acta di hipoteca cu Stichting Algemeen Pensioenfonds Aruba (APFA) cu lo ta co-financiador di e proyecto hunto na Nationaal Restauratiefonds di Hulanda (NRF) y Ministerio di Economia, Comunicacion y Desaroyo Sostenibel.

Un di e condicionnan importante pa yega na un remarca pa un financiamento via NRF y ademas cu ta un di e condicionnan pa SMFA por cumpra un edificio ta cu esaki tin un balor monumental y ta conta cu proteccion. Den e caso di Cas Veneranda a entrega un peticion pa proteccion na Monumentenbureau. Na momento cu e proyecto di restauracion termina, y e proceso di proteccion keda completa lo pone e seyo di proteccion riba e fachada cu ta indica cu ta un Monumento protegi.

Otro condicion importante pa Monumentenfonds por cuminsa cu un proyecto nobo di adkiri y restaura un monumento ta cu mester tin un acuerdo di huur cu por garantisa cu SMFA por cubri e gastonan di e proyecto y mantencion di e edificio. Una bes termina Cas Venereanda lo tin dos huurdo cu ta encarga di trece un bida nobo den e edificio. DEACI (Departamento di Asuntonan Economico, Commercio y Industria), lo ta e huurdo principal. SMFA ta den combersacionnan cu un di dos huurdo pa e parti di horeca cual nos lo anuncia pronto. E edificio lo conta cu dos funcion diferente cu ta garantisa cu e comunidad completo por bishita y aprecia e bunita monumento aki cu un arkitectura unico den cento

Finalmente na september SMFA a presenta e bouwteam encarga cu e proyecto cu ta consisti di Orlando Hoevertsz Archidesign como arkitecto, Hecom, Dynaf, Smart Systems y Protec bou di guia di nos líder di proyecto Daphne Every. E team a traha rib’e parti di investigacion y diseño pa e restauracion

Recientemente a tene un destaho caminda varios compania a participa pa e prome fase cual ta encera trabounan di “sloop”. Basa rib’e prijs, plan y experticio a otorga e proyecto na e compania General Property
Lo kita partinan di e edificio cu no ta original p’asina por continua cu e investigacion historico y tambe lo habri un parti di e regenbak di e edificio caminda tin hopi humedad pa asina laga aire fresco drenta

Minister di Economia, Comunicacion y Desaroyo Sostenibel, Geoffrey Wever hunto Minister di Finanzas y Cultura, Xiomara Maduro y directora di DEACI , Maria Dijkhof Pita a duna inicio oficial na e proyecto di restauracion door di cuminsa cu e “sloop”

Den dianan venidero e contratista lo continua cu e trabounan cu lo dura aproximadamente tres luna. Despues di e fase aki lo sigui otro destaho pa scoge e compania cu lo ehecuta e trabounan di restauracion pa hiba e edificio bek den su gloria. SMFA ta spera cu pa final di 2025 Aruba lo tin un monumento mas completamente restaura pa futuro generacionnan

Cas Veneranda
E edificio impactante den Wilhelminastraat a keda construi na 1936 pa Federico Maximiliaan (Machi) Arends cu tabata e consul di Spaña
E arkitecto tabata e conocido bouwmeester Dada Picus, cu a bay te Cartagena Colombia pa haya inspiracion for di un edificio cu esposa di Machi, Maria Veneranda, tabata encanta cune y asina a bin Aruba bek pa construi e edificio cual awe nos conoce bou di e nomber di Cas Veneranda. Un di e casnan mas grandi na Aruba den e tempo ey construi
Aparte di tabata un vivienda akinan tambe tabata tin un flowershop, un lugar pa bende ijscream y e consulado di Spaña. Durante añanan setenta a comberti e edificio den Papiamento restaurant. Despues cu e restaurant a sali di e edificio esaki a haya algun otro funcion manera club nocturno y despues a keda bashi. Na 2014 un candela grandi a destrui gran parti di e interior. Pa seguridad a cera e edificio cual pronto lo keda completamente restaura

Stichting Monumentenfonds Aruba
Stichting Monumentenfonds Aruba ta existi for di aña 1996 y ta un organisacion no gubernamental encarga cu adkiri, restaura, huur y mantene monumentonan di Aruba. Banda di esaki tambe ta pone enfasis riba educacion y conscientisacion tocante e importancia di nos monumentonan como parti di nos herencia cultural. Cas Veneranda ta bira e di 17 monumento cu ta propiedad di Stichting Monumentenfonds Aruba.

Pa mas informacion y pa por sigui e proyecto di cerca: www.monumentenfondsaruba.com IG: @monumentenfondsaruba fb:Stichting Monumentenfondsaruba

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio