ORANJESTAD, Aruba – 18 di september 2023. E Facultad di Hospitalidad y Turismo (FHTMS) di Universidad di Aruba (UA) tin e honor y placer di anuncia cu e plan prepara pa e studiantenan: “The Fofoti Tech Lab”, un diseño pa revoluciona educacion a traves di integracion di tecnologia avansa, a wordo eligi como becaria pa ciclo 4 di Fondo EduTech.
Den liña cu e vision strategico di UA, e “Fofoti Tech Lab” tin como meta pa sera e diferencia entre educacion tradicional y e mundu tecnico avansa. E beca lo cubri “hardware” di ultimo generacion y “software” inicial pa implementa e asina yama “pilot”, e studiantenan lo tin acceso incomparabel na e ultimo desaroyonan tecnologico relevante pa nan area di estudio.
Un di e carecteristicanan unico di e laboratorio lo ta e integracion di realidad virtual, cu lo duna studiantenan experencia practico cu lo ta dificil pa logra den un klas convencional. E enfoke aki no solamente ta ekipa e studiante cu conocemento practico, pero tambe ta cultiva habilidadnan esencial di siglo XXI y ta promove ciudadania digital, mehorando significativamente nan competitividad den e mercado laboral local y global.
Decano Sue-Ann Lee ta remarca: “Esaki ta un di e mihor momento nan pa nos tur na UA. Un sincero felicitacion y danki na tur esnan cu a apoya e iniciativa y a coopera pa haci esaki posibel. Especialmente nos studiantenan Sharel, Jailene, Tanishka, Ellie, Winston, Fenicie, Jeanice y Angelica cu tabata traha sin descanso y cu hopi pasion pa trece innovacion den educacion na UA.”
E Laboratorio di Tecnologia Fofoti ta un testimonio di e compromiso firme di UA cu educacion pionero. Y cu esey satisface e demanda di e mundo moderno. Inversion den tecnologia na UA no solamente ta prepara studiantenan pa exito, pero tambe ta contribui na e avansa di Aruba como pais.
###
Facultad di Hospitalidad y Turismo di Universidad di Aruba ta reconoce e contribucion unico y strategico di e industria di turismo pa e desaroyo di Aruba y Caribe. Pa mas informacion di nos programa por bishita nos na www.ua.aw of via facebook @UA.FHTMS