Savaneta – Diadomingo marduga algo pasa di 2’or varios unidad policial y tambe ambulance a bay altura di S-Chow supermarket, unda a sosode un accidente frontal.
Cu urgencia tanto polis y ambulance a bay e sitio, mirando cu e ta area cu sa sosode accidentenan bastante pisa y den e caso aki no tawata diferente.
Na yegada polisnan a topa cu e dos vehiculonan pega contra otro, tawata trata di un Nissan March y un Hyundai Accent.
Locual polis a wordo informa na e sitio door di testigo/nan tawata cu e Nissan March tawata bayendo direccion San Nicolas cu velocidad halto. Dado momento e ta kita bay na su man robes y dal frontal contra e Hyundai Accent bayendo pabou.
Den e Accent tawata tin un pareha, unda cu ambos a resulta herida.
Tres Ambulance
Na e sitio di desgracia a presenta 3 ambulance, pero solamente dos a wordo usa. Paramediconan mester a duna asistencia na e pareha den e Accent cu na final tur dos mester a bay Hospitaal pa atencion medico.
Chauffeur di e March cu ta un hoben, a wordo getest pa alcohol na e sitio mes y a resulta cu e la bebe dimas. Ey mes e la wordo deteni y transporta cu transportwagen pa warda di San Nicolas.
Caminda a keda cera pa algun rato, te ora cu takelwagen por a kita ambos vehiculo for di caminda.
