WVB/Tanki Leendert – Diasabra merdia polis a bay pura pabou di e rotonde nobo di Tanki Leendert o sea Watty Vos Boulevard direccion Ponton. Eynan un Mitsubishi Lancer mester a accidenta.
A resulta cu e vehiculo aki lo a wordo horta, for di un supermercado situa den Driemasterstraat.
Segun informacion, aparentemente un señora lo a baha na Tololo Supermarket y di eynan un homber probablemente ariba un bicicleta a yega y pasa man pa e Mitsubishi Lancer.
No ta conoci si e yabi a keda den e vehiculo cu por a facilita e ladron di auto e trabou.
Mesora cu e acto aki a tuma luga a bati alarma.
Durante cu e ladron tawata bezig ta huy cu e vehiculo e la dal un Volkswagen color preto. Chauffeur di e Volkswagen a sigui su tras, pero segun e mes a conta nos cu cautela paso no sa si e persona por tin un arma ariba dje.
Testigonan/Chauffeur di e Volkswagen
Na e sitio unda e auto a boks, un testigo a conta con e ta bayendo direccion Ponton y ta mira con e Mitsubishi Lancer horta a bula di e otro banda y bin den direccion contrario.
Chauffeur di e Volkswagen cu tawata tras di e auto cu a dal e a bay bira, y segun e la conta e ta wak con un homber hoben “bon bisti” a baha core bay direccion nort y desaparece.
Pues e ladron di auto a maniobra of a haci esaki pa malo, momento cu e tawata bayendo rotonde nobo di Tanki Leendert ta hala na su man robes y subi e berm(separacio di caminda.
Aki e ta ranca un palo di luz completamente bay cay otro banda halando na su man robes contra e trafico contrario pa despues baha laga e auto cendi y core bay.
Polisnan cu a yega algun minuut despues ta haya un Mitsubishi Lancer cu e motor cendi y completamente destrui y banda di e dje e Volkswagen color preto cu sla na banda drechi.
Polis di trafico mester a presenta pa atende cu e caso mientras un otro patruya a bay e supermarket den Driemasterstraat pa haya mas informacion.
Joyriding Team tambe a wordo poni na altura, investigacion mester bay saca afo ken e ladron ta y unda pa hay’e.
