Home » Rumannan Rebecca y Christiaan Jansen a logra podium na Barbados den e deporte di Triathlon

Rumannan Rebecca y Christiaan Jansen a logra podium na Barbados den e deporte di Triathlon

by Admin
0 comment 112 views

Diadomingo siman pasa atletanan Jansen a biaha pa Barbados bou guia di Head Coach Nicolaas Robert pa asisti na un 2023 World Triathlon Development Regional Pre-Race Camp Barbados unda nan a siña con pa prepara nan mes pa un careda tambe nan a haci test di landamento, coremento y ciclismo. Despues di un siman di campo di entrenamento nan ta finalisa esaki cu un Campionato yama 2023 World Triathlon Development Regional Cup Bridgetown unda e miho atletanan di region caribe a participa.

Rumannan Rebecca y Christiaan Jansen a logra podium na Barbados unda atletanan di Jamaica, Greneda, Trinidad and Tobago y Barbados a participa. Rebecca ta logra un medaya di Oro y ta laga nos himno “Aruba Dushi Tera” resona nan Barbados y Christiaan ta logra un medaya di Plata esaki den categoria elite. 

Mester bisa cu tanto Rebecca y Christiaan a logra un Personal Best, Rebecca ta caba e Sprint Triathlon cual ta 750 m landa, 20 km ciclismo y 5 km core na pia den 1:10:19 y Christiaan ta caba esaki den 1:01:40. Christiaan tabata un di e atletanan mas hoben den e evento aki y cu solamente 15 aña di edad ta lidera e careda den landamento y ciclismo pero den coremento e ta wordo pasa y ta caba 20 seconde patras di ganador procedente di Barbabos. Rebecca ta caba su careda despues di su ruman homber Christiaan y ta drenta e di tres overall dilanti di tur e otro atletanan masculino y femenino cu a participa.

Rebecca y Christiaan Jansen ta multi-atletanan grandi di nos deporte local. Na banda cu ambos ta bon den triathlon cual ta nan deporte principal, Rebecca y Christiaan ta sobresali den e deportenan di coremento y ciclismo tambe ganando subiendo podium den casi tur careda. 

E rumanan Jansen kier a gradici Aruba Triathlon Association pa a duna nan e oportunidad bonita aki pa por a representa Aruba na e gran evento aki. Danki na e Federacion di Barbados y Americas Triathlon pa e invitacion. Un danki na Total Services a yuda cubri parti di e gastonan. Danki tambe na tur nan coachnan cu a yuda Rebecca y Christiaan durante tur e añanan den deporte di Triathlon, Coremento na Pia, Ciclismo, Landamento y Gym.  

Diaranzon e rumannan lo biaha for di Barbados pa Santo Domingo pa competi na e evento di 2023 Americas Triathlon Junior Qualification Event Punta Cana unda paisnan di full e continente di America cu lo participa. Aki lo topa cu e seleccion di Aruba cu lo ta biahando mayan pa Santo Domingo.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio