Despues di 7 aña sin cu a haya e oportunidad di hunga na cas, e amantenan di futbol por mira nos seleccion nacional di futbol di Aruba den accion atrobe.
E di tres siman di maart durante di e FIFA Window, seleccion nacional lo tin un campo di entrenamento na Aruba mes y aki mas cu claro lo probecha di hunga un wega di fogeo contra di un team international di hungadornan cu ta milita den nos futbol local. E wega ta programa pa tuma lugar 25 maart proximo pa 8or di anochi den Stadion Guillermo Prospero Trinidad na Dakota.
Mester bisa cu Aruba lo bini cu 10 seleccionado biba den exterior. Mirando e interes semper pa mira nos seleccion hunga na cas, e interes lo por ta uno grandi caminda por spera un stadion sold out cu mas cu 3000 hende. Ticket pa e wega ya ta obtenibel na oficina di AVB, Citgo Savaneta, Citgo Boulevard, Citgo Palm Beach, Urataka Center y Birds ‘N Fishes. Lo tin diferente door prizes den stadion mes durante e wega. Porta lo habri ya desde 6:15 PM y pa 6:30 PM e banda Le Groove lo ta tocando den stadion.