Despues di a hunga un torneo den forma di un round robin Aruba Basketball Bond ta cuminsa cu su playoffnan semi final y final.
Diabierna awo, 12 di April 2024, riba cancha di Aruba Juniors na Socotoro lo tin dos wega semifinal di basketball division pasarella (U14) sumamente intresante. E prome wega cu ta cuminsa 7or pm lo bay entre Impact y Dream. Impact den e prome buelta di playoff a elimina Aruba Juniors Pirates mientras cu Dream a clasifica direct pa e semifinalnan despues di a caba e round robin invicto. E di dos wega lo ta entre Stealers y Estrella. Stealers den e prome buelta di playoff a elimina e otro team di Aruba Juniors, esta Aruba Juniors Jets. Estrella a clasifica direct pa e semifinalnan door di a caba e round robin na di dos luga. Dos wega sumamante intresante mirando cu e ganadonan lo hunga e gran final diamars otro siman dia 16 di April 2024 na club Estrella na Santa Cruz.
Diasabra, 13 di April 2024, e finalnan mes lo cuminsa ora cu pa 5or atardi na YMCA San Nicolas Impact topa Stealers den division Cadet (U16). Tanto Impact como Stealers a elimina Marlins y Rockets di Aruba Juniors. Stealers ta hunga un wega agresivo cu atakenan continuo mientras cu Impact su agresividad ta den su defense. Ambos team di San Nicolas, rivalnan di otro lo duna todo por todo pa bay cu e titilo. E di dos wega diasabra lo ta entre Stealers y Aruba Juniors Blue Stars. Den Campeonato nan a enfrenta otro dos biaha unda nan cada un a gana un wega. Por spera un wega duro y lihe mirando cu ambos team tin hungadonan veloz. E wega ta programa pa cuminsa 6:30 na YMCA San Nicolas.
Aruba Basketball Bond ta orguyoso pa anuncia cu despues di 18 aña lo tin un final di damas. E aña aki a hunga un torneo entre tres team cualnan ta Stealers, Impact y Aruba Juniors. Nan a topa otro dos biaha den e round robin. Finalmante Aruba Juniors y Impact lo hunga e gran final. Aruba Juniors lo bin cu team completo diamars awo pa purba kibra e invicto di Impact y bay cu e titulo. Di otro banda E invictonan di Impact lo bin fuerte pa mantene nan invicto y di mes titula campeon. E wega aki lo tuma luga diamar 16-4-2024 pa 7or na Club Estrella na Sta Cruz. Despues ta sigui e gran final di Pasarella. Esaki ta e division cu mas team a participa y por bisa cu e campeonato tabata esun mas intresante. E ganadonan di diabierna awo lo hunga e final otro siman diamars. E wega ta programa pa 8:30 pm.
Mayornan, famianan y tur bon amante di basketball ta cordialmente invita pa bin apoya e hobennan den e finalnan.
Aruba Basketball Bond ta funda na aña 1952. E directiva actual tin como presidente Luis Tromp, Secretario Rudy Croes, Tesorero Brian Van Spaandonk, Vice Presidente Jen James Russel y comisarionan Jamal Courtar y Julie Curiel.
