Sabana Berde/ Camacuri:
Diaranson den careda di di 2’or y 50, un airbus di American Airlines AA 534, cu destino Philadelphia a lanta buelo. Abordo tabata tin 147 persona.
Un poco panort di Aruba e piloto a haya un senjal cu den e cargo compartment lo tin algo no ta bon y tambe motor number 1, tabata sacando un zonido stranjo.
E piloto no a confia esaki y mesora a avisa toren di Aruba cu e lo mester bin bek Aruba y haci un aterisahe di emergencia. Maske cu e tabata tin fuel pa 5 ora.
Mesora toren a bati groot alarm y asina e preparacionnan necesario a cuminsa. Polis mesora a cuminsa posiciona su patruyanan na e puntonan strategico. Na rotondenan cerca di airport y cera e caminda di Camacuri y tur cu ta yega cerca di airport, panort, pazuid y pariba di Airport.
Trucknan di brandweer di kazerne di San Nicolas y Tanki Flip a bay na post di Sabana Berde, pa si acaso mester asisti den cualke eventualidad.
Varios unidad di ambulance tambe a yega pa si mester duna asistencia medico.
Airport y tur esnan concerni tabata cla prepara pa yegada di e avion, den careda 3’or y 40 di atardi e avion a logra baha sin problema.
Na yegada e capitan a pidi toren pa brandweer haci un control na e partinan essencial, vooral na e cargo pin, pa mira si e tabata sacando huma. Brandweer a controla esaki, pero e no tabata sacando huma. Asina mes den e cockpit tabata keda mustra cu lo mester tin un fayo den e cargo compartment.
E avion a wordo manda na posicion 12 y asina por a cancela e groot alarm. Tur pasahero a wordo baha for di e avion pa asina nan por controla esaki mas miho y na un forma mas safe.
