Na September 2021, Aruba Tourism Authority (A.T.A.) a re-inicia su enfoce riba e campaña cu ta hiba e nomber “My Promise to Aruba”. E proyecto ta encurasha tanto e comunidad di Aruba, pero sigur e bishitantenan pa cera conoci un tiki mas di cerca cu y aprecia e esfuersonan tumando luga riba nos isla pa cu sostenibilidad. Riba www.aruba.com/promise a crea un presentacion cu ta refleha cu fotonan bunita y expresionnan di solidaridad pa e flora, fauna y naturalesa en general, nos hendenan, nos cultura, y e compromiso pa conserva, preserva, respeta y promove Aruba den su totalidad.
“My Promise to Aruba” ta dirigi principalmente na e bishitante, y residentenan ta invita pa tira un bista y tambe haci nan “promise” y compartie riba nan rednan social. E proyecto ta un forma mas pa atrae comportacion socialmente y ecologicamente responsabel y enfoca riba e orguyo di por contribui y expresa nan dedicacion na e cuido y bienestar general di Aruba.
Den e area di hotelnan, A.T.A. a laga instala poster den paradanan di bus riba luganan strategico, cu diferente “promise” cu e turista por haci, y a inclui un QR-code pa haci e acceso na e link mas facil.
Cu e re-inicio di e campaña na Aruba, cu promocion na e paradanan di bus y e videonan “in-house” den cambernan di hotel, ya A.T.A. a midi un crecemento di interes pa e campaña y un prome “boost” di casi 200 “promesa” nobo. Esaki ta apenas den e prome simannan di e re-inicio di e campaña. Den e proximo lunanan lo sali tambe un publicacion riba rednan social, y den revistanan di informacion y promocion di nos isla den cambernan di hotel.
“Mi ta priminti Aruba cu mi lo yuda preserva e isla aki pa futuro generacionnan”. Esaki ta e prome frase di e presentacion; un frase simpel cu ta deseo di tur residente y bishitantenan fiel, orguyoso y consciente.
Siguientemente por “scroll” door di un serie di promesa relaciona na elementonan cu ta parti di loke a y ta haci di nos isla y su hendenan famoso como “One Happy Island”. Tur ta factornan cu nos tur mester ta consciente di nan, pa nos isla por ta uno sostenibel, saludabel y prospero.
Pa tur esunnan cu kier haci nan promesa na Aruba por haci esaki via www.aruba.com/promise. Por download e certificado cu bo nomber y “share” manera ta desea cu bo famia, comunidad of simplemente pa bo so.
A.T.A. a lansa “My Promise to Aruba” prome biaha na aña 2019, pa sostene y promove un codigo di conducta cu ta motiva comportacion y consciencia poniendo enfasis riba e isla su balornan cu mas ta destaca.
