Home » Historia di Aruba: 1947, un aña di castigo di prison pa chauffeur cu a mata un Mama cu su yiu chikito y a herida 11 persona den un accidente

Historia di Aruba: 1947, un aña di castigo di prison pa chauffeur cu a mata un Mama cu su yiu chikito y a herida 11 persona den un accidente

by Admin
0 comment 194 views

Historia di Aruba: E biaha aki nos lo dedica e historia di Aruba, na un caso hopi tristo cu a sosode na aña 1947, e tempo ey tabata parce cu bida di hende no tabata tin mucho balor.

Un mama nos lo yame Diana y su yiu homber chikito nos lo yame Pedro. Diana tabata tin 30 aña y su yiu Pedro tabata tin 7 aña.

Pasa dia na Eagle Beach cu famia
Diadomingo 11 di mei 1947, manera cu mainta a habri, Pedro a lanta hopi contento y  ansioso pasobra e dia aki lo ta bay ta un dia hopi dushi pa Pedro, su mama a priminti’e cu hunto cu algun otro miembro di famia y amigonan, nan lo bay Eagle Beach, cu e tempo ey tabata hopi leu te otro banda di Aruba. Nan mes tabata biba na e parti pariba di Aruba.

Pedro asina felis hunto cu su mama a bay bon prepara, pa pasa un dia na Eagle Beach. E otro parti dushi di e trip tabata cu nan tin cu bay den un carioca chikito (un truck chikito cu e parti patras di palo).

E mainta ey Diana hunto cu Pedro y 11 otro persona mas a subi den e carioca y felizmente bou canto, papiamento y harimento nan a bay direccion pabou. Un caminda largo, e solo tabata halto caba, sinta patras den e carioca, nan tabata sinti e biento fresco ta supla masha dushi mes.

Un grupo di hende consistiendo di famia y amistadesnan a bay hunto pa pasa dia na Eagle Beach. Na yegada na Eagle Beach, tur hende a baha for di e carioca y a busca un lugar pa pone nan cosnan bou mata di druif of kwihi.

Pedro a pasa un dia masha dushi mes, e por a hunga cu mucha, riba beach y den lama, tambe a come y bebe loke famia y amigonan a parti. E hendenan  grandi tabata sinta den sombra ta toca guitara, canta y tambe disfruta di algun snacks y bebida.

Den oranan di atardi a sali pa bay cas bek pero no a yega cas mas
Algo despues di 6’or, e grupo a subi bek den e carioca pa bay cas. Bayendo cabes pariba, Pedro hopi cansa y kima di solo a sinta den scochi di su mama. Nan tabata pura pa yega cas, sin sa kiko destino tabata tin pa nan prepara. E carioca a bay direcion di Oranjestad y dje a sigui bay pariba.

Na altura di Pos Chikito, bida di e 13 personanan aki a cambia por completo. Na dado momento e carioca a paga y no kier a start. Algun persona a baha pa yuda pusha esaki pa asina e chauffeur por a trata na start e bek. Na momento cu nan tabata pushando, nan tras a bin un auto cu velocidad hopi halto, e chauffeur tabata pata pata. E no a controla su velocidad na tempo y dal hopi duro contra e parti patras di e Carioca. E impacto fuerte a pone cu palonan di e carioca a kibra y tambe tur persona cu tabata sinta patras den e carioca a bay halto y a cay riba caminda. Un accidente hopi tristo cu e tempo ey a sacudi Aruba.

Chauffeur burachi a causa e accidente cu a costa bida di Diana y Pedro
Diana cu Pedro lamentabelmente no a sobrevivi e accidente aki. Riba e caminda por a mira e victimanan benta y rond di nan tabata tin tur parti pida palo, cu tbt pertenece na e baki di e carioca.

E impacto tabata hopi fuerte, cu e mama y yiu a muri mesora na e sitio, tambe e otro 11 personanan a keda seriamente herida, tur a wordo hiba hospital y a keda interna na hospital. Un chaos completo na e sitio, gritamento y pidimento di ayuda.

E chauffeur di e auto cu  ocasiona e accidente, a sigui core y a bay dal contra un palo di luz
E chauffeur cu a ocasiona e accidente mes a sigui bay un poco mas pariba, aki e la dal contra un palo di luz cu su auto. E si no a keda herida.

Nemencio nos lo yama e chauffeur cu e ocasiona e accident aki. Nemencio a nace na Venezuela y como adulto e la bin biba na Aruba. Poco tempo despues Nemencio a casa y a forma un famia cu un señora Arubiano. Na 1947 Nemencio tabata mecanico di profession.

Nemencio a bay playa y despues di a topa Juan a bay dal algun bitter cu ne
Riba e diadomingo aki Nemencio despues di merdia a bay playa, dilanti V.O.C. na playa Nemencio su auto a paga  y no kier a start. Un persona, nos lo yame Juan, a duna Nemencio un man pa asina e por a start e auto.

Nemencio y Juan a bay dal poco bitter
Nemencio na su turno a invita Juan pa nan bay dal dos bitter na Aruba Restaurant, dos bitter no tabata suficiente pa Nemencio y e la bisa Juan, pa nan bay un rato Flor de Oriente pa sigui dal poco bitter mas. Na Flor de Oriente nan a start un bebemento di rom te cu nan no tabata corda mas cuanto kelki nan a bebe.

Un poco despues di 6’or Juan a bisa Nemencio cu e ta bay cas. Asina tambe Nemencio a subi su auto y a cuminsa bay direcion pariba.

y tambe sin sa kiko destino tabata tin prepara p’e na altura di Pos Chikito. Un accidente cu a cambia bida no solamente di e victimanan pero di Nemencio tambe.

Polis a tuma Nemencio su declaracion y a lage bay
Despues di e accidente polis a tuma declaracion di Nemencio y a lag’e den libertad. Nemencio a declara na polis, cu e tabata core 50 kilometer pa ora y tambe cu e no a mira e carioca pasobra den e caminda tabata tin un coba, bahada of ta un buraco cu a obstaculisa su bista. Tambe e la declara na polis, cu e no tabata coriendo cu bright pasobra ainda tabata cla. E no a mira e carioca su dilanti tampoco, pasobra segun su persona e carioca tabata para memey di caminda  y lo tabata tin hende ta pushando esaki na e momento ey.  Polis a puntre cuanto e la bebe y e la bisa polis 3 pa 4 bitter, polis di e tempo ey lo a kere.

Nemencio a huy bay Venezuela pa no mester a presenta  dilanti mesa berde
Nemencio a presenti cu e lo bay haya un castigo pa e hecho cu e la causa un accidente hopi serio den cual a costa bida di un mama cu su yiu chikito y alabes a laga 11 persona herida, algun te hasta grave. Algun dia of simannan despues di e accidente. Nemencio a subi boto y a bay su pais natal, lagando su señora y yiunan atras na Aruba.

Señora di Nemencio a firma su dagvaarding
Dia 18 di juli 1947, e la haya un dagvaarding den cual e ta wordo informa cu e mester presenta na corte dia 8 di augustus 1947, pero e no tabata na Aruba y e dagvaarding a wordo firma pa su casa.

Sentencia 1 aña di castigo di prison y perde su rijbewijs pa resto di su bida
E caso a wordo trata den Corte di Prome Instancia y sin cu Nemencio tabata presente, e tabata na Venezuela. Corte den Prome Instancia a sentencia Nemencio na 1 aña di castigo di prison y tambe cu lo trek in su rijbewijs pa resto di su bida.

Despues di e sentencia su yiu a bay bishit’e na Venezuela y a informe di e castigo cu ta warde na Aruba. E yiu tabata pidi su tata pa bin bek Aruba y duna cara, pa e bringa su castigo of tum’e, pero ni kiko e yiu a haci, Nemencio no kier a tende di bay bek Aruba.

Nemencio scondi na Venezuela
Nemencio a keda scondi na Venezuela pa casi 21 aña. Den transcurso di e 21 añanan cu a pasa, e yiunan di Nemencio na varios ocasion tabata bishita nan tata y tabata keda pidi’e pa e bin bek Aruba. Segun Nemencio e lo tabata tin miedo cu famia di e victimanan lo por a tuma represaya riba dje. Tambe Nemencio tabata haya cu e castigo di un aña cera den prison tabata mucho hopi p’e. Nemencio den e 21 añanan aki tabata tin masha poco contacto cu su señora, e corespondencianan tabata masha tiki.

Un caso cu a tuma mas di 21 aña pa e culpabel haya su sentencia, un sentencia cu sigur ta refleha cu bida di hende no tabata tin balor. Nemencio a kere cu despues di 20 aña Husticia na Aruba lo lubida riba su castigo of cu esaki lo caduca (verjaar).

Nemencio a bin bek Aruba, keriendo cu Husticia a lubida riba dje
Awel riba un bon dia den April na aña 1968, Nemencio a pisa tera bek na Aruba, full confiado cu Husticia a lubida caba riba dje y cu e no lo mester bay sinta niun castigo. Aki e la faya, hopi lihe husticia a haya sa cu Nemencio ta na Aruba bek.

Bishita di Deurwaarder
Dia 26 di april, Deurwaarder a presenta na cas di Nemencio y a dun’e e sentencia cu nunca e la ricibi for di 8 di augustus 1947, e caso den corte den cual e no tabata presente. Den dos dia Nemencio a contra e sentencia aki.

Nemencio a bay contra e sentencia di 1947
Diabierna 10 di mei 1968, Corte di prome instancia a saca e caso cu nan tabata tin 21 aña warda den lachi. E caso contra e mecanico Nemencio naci na Venezuela di 62 aña, kende a bay contra e veredicto di hues den cual e la wordo sentencia dia 8 di augustus 1947, cu 1 aña di castigo di prison y prohibicion pa resto di su bida pa stuur auto.

Maske cu Fiscal a baha pisa riba dje den corte y a mustre e diferencia entre tempo di verjaring( caducacion) di persecusion di un acto castigabel y tempo di verjaring (caducacion) di ehecucion di un sentencia.  Den Corte di Prome Instancia Nemencio den a haya rason y Ministerio publico no. Supuestamente pasobra Ministerio publico no lo a haci suficiente pa persigui e acusado. Hues a duna Nemencio rason, cu su caso a verjaar  (caduca) Fiscal na su turno mesora a apela.

Hof a trata e caso, Fiscal a apela
Na september 1968 Hof a trata e caso den corte, Nemencio un biaha mas a dicidi cu e mes lo representa su persona den corte y cu e no mester niun abogado pa represente dilanti mesa berde.  Durante e tratamento di e caso, Nemencio a haya un bon tolk.    E ta posibel si un acusado mes kier bringa su caso. Esaki tabata un eror grandi, pasobra na varios ocasion durante tratamento di e caso, e tabata hinca su mes den mas baina ainda. Hof si a duna na Oktober 1968, Procurador General rason y Nemencio a wordo sentencia cu un aña di castigo di prison y su rijbewijs a wordo kita pa semper for di dje, pa nunca mas e core auto, e mesun sentencia cu e la haya caba dia 8 di Augustus 1947.

Nemencio, “castigo ta mucho pisa”
Durante tratamento di e caso, den corte di Prome Instancia Nemencio a declara cu e no tabata sa di niun caso contra su persona den Corte. Segun su persona ni su yiu cu a bin bishite na Venezuela y cu tabata trata na convence pa e bin bek Aruba no a bise nada. Tambe e la bisa Hues cu e la bay biba na Venezuela, pasobra e tabata tin miedo cu famianan di e victimanan lo a tuma represaya contra su persona. Hues na su turno a haci Nemencio e pregunta, cu si no ta miedo e tabata tin di un castigo dicta den Corte. Nemenio su contesta riba e pregunta aki no tabata duidelijk, pero si e la declara cu e ta haya e sentencia cu e la ricibi dia 08 di augustus 1947 uno hopi pisa.

E la keda nenga di no tabata na altura di su sentencia di dia 08 augustus 1947
Nemencio a keda para ariba cu nunca e la scucha di su sentencia di 8 di augustus 1947, te hasta e la bisa cu ni su señora cu tabata skirbi’e no a bise di esaki. Maske cu e contacto entrenan e temporada ey no tabata mucho bon.

E la keda nenga di tabata na altura di e sentencia di e caso, e la nenga cu Deurwaarder a pone firma su sentencia ora e la bin bek Aruba. E deurwaarder a wordo yama den corte y prueba cu Nemencio a firma su sentencia y tambe e deurwaarder a bisa den corte cu te hasta e la splica e acusado con e cos ta hinca den otro.

Deurwaarder a aclarea su mente
Diripiente Nemencio su memoria a clarea y a corda tur cos cu e deurwaarder a bise. Nemencio no kier a bisa ki dia exacto e la yega Aruba y no por of no kier a duna e fecha cu e la bandona Aruba, despues di e accidente. Segun Fiscal esaki no lo tabata mucho tempo despues di e accidente fatal, mirando cu e no a firma su dagvaarding.

Declaracionnan contradictorio
Tambe den Corte Nemencio a declara cu e tabata coriendo riba un velocidad di 80 KM pa ora, siendo den su declaracion na 1947 e la bisa cu e tabata coriendo 50. E la declara na 1968 cu e tabata coriendo cu su luznan riba bright y ta bolbe contradici su mes paso den su declaracion na 1947, e la bisa cu e tabata coriendo cu su luznan riba dim, paso no tabata asina scur. Asina e la keda contradici varios biaha den su declaracionnan, te cu Hues mester a atende cu ne. Mesora e la bisa Hues cu ta algo di hopi aña pasa y cu e no por corda, ni confirma of nenga algo cu e la declara e tempo ey dilanti polis.

Tambe e la sigui defende su curpa bisando cu e caminda na altura di Pos Chikito tabata tin un coba of bahada y pa e motibo ey no a mira e carioca.  Fiscal a bise cu riba e caminda ey no tin niun buraco, niun bahada y mucho menos coba. Nememcio a declara den corte cu algun persona tabata pusha e carioca cu no kier a start, e la sigui bisa cu e no a dal patras di e carioca sino na banda. Na final di su declaracion e la haci un peticion riba verjaring, mirando cu ta algo cu a sosode 20 aña pasa y cu no por tin niun persecusion penal mas contra dje, paso e la caduca.

Dos testigo a presenta den corte
Autoridad a trata na busca varios testigo, pero dos so por a wordo yama, pa motibo cu e otronan lo a bay biba otro caminda. E prome testigo tabata Juan, kende a topa Nemencio na altura di V.O.C. y a yuda e Nemencio pusha su auto, pa motibo cu e auto no kier a start.

Segun Juan, Nemencio no tabata bebi ora e la tope. Despues e la bay cu Nemencio dal dos bitter, na Aruba Restaurant y Flor de oriente. E no ta corda mas cuanto bitter nan a dal segun Juan, 3 of 4.

E la bisa Hues cu di e accidente mes e no sa nada paso e no tabata den auto cu Nemencio.

E di dos testigo a declara cu e no ta corda mucho bon mas, pero e anochi ey e tabata biniendo for di San Nicolas pa bay Santa Cruz. Na altura di Pos Chikito enberdad e la mira e carioca, cu tabata memey caminda. Tambe locual e ta corda cu algun persona tabata pusha e carioca, pero e no ta sigur. E la mira e lusnan di auto di e acusado biniendo di pabou. Segun e testigo aki e la scucha e impacto, pero no a mira e accident mes sosode. Dia di e accidente Si e la declara na polis, cu e la mira con e pida palonan di e carioca y e hendenan sinta patras a bay halto y a spart for di otro. Anto 21 aña despues e no por corda mucho mas y a bisa muy bien posibel.

E la wordo confronta cu esaki den corte y mesora e la bisa cu e no ta corda mucho bon mas y a sigui bisa, cu e tempo ey e la declara tur locual e la mira, pero e no sa si polis a tuma su declaracion manera cu su persona a declara y sin cambia of a laga algo afo.

Procurador General a baha pisa riba Nemencio
Procurador General a mustra cu Nemencio e dia aki a core un auto, mientras un rato prome e tabata bebiendo alcohol. E la boks contra e Carioca, e la sigui core y a bay dal contra un palo di lus. E consecuencianan di su hecho aki tabata uno hopi horibel. Dos morto y 11 herido, aldun a keda den situacion critico. E unico cos cu e acusado por a bisa, ta cu e dia ey e no a bebe hopi alcohol.
Den su acusacion procurador general a bay riba diferente punto di e caso cu a wordo riba 8 di augustus 1947, caminda e acusado a briya cu su ausencia y esaki a wordo confirma den e demanda di Fiscal y e hues a dicta un sentencia contra Nemencio.

Verjaring (caduca)
Segun procurador general e acusado no a haci e peticion pa verjaring(caducacion di su caso). E sentencia den cual hues no a duna Fiscal rason, a pone cu Fiscal a bay den apelacion.
Segun Procurador General, Nemencio no a haci peticion riba e verjaring di e caso. E la mustra mas den direcion cu e acusado despues di 21 aña e la firma e sentencia y a bay mesora contra su sentencia.

Procurador General ta haya cu Corte den Prome Instancia no mester a duna Nemencio rason, pero Fiscal mester a haya rason. Door cu a duna Nemencio rason y Fiscal No, ta mustra mescos cu nunca a existi un persecusion penal. Pa e motibo aki Procurador General a pidi pa destrui e prome sentencia y pa asina duna Nemencio un sentencia nobo. Dos siman despues hof lo duna sentencia na Corsou.

E sentencia pa N.G. a keda mescos cu dia 8 di augustus 1947
Den luna di Oktober 1968, Hof a duna sentencia, contra e venezolano N.G. kende riba 8 di augustus 1947 a haya un sentencia di un aña di castigo di prison y tambe a kita su rijbewijs pa resto di su bida. E la keda sentencia y haya culpabel di a kita bida di dos persona y a laga 11 otro persona seriamente herida.
Durante cu Hof a trata e peticion di fiscal, Procurador general a bin na e conclusion cu e acusado durante tratamento di su caso na 1947 no tabata presente pa defende su persona pero awo Si kier bay contra.

Nemencio a haya su castigo y lo mester a djis sinta 1 aña den prison pa a kita bida di un mama, un mucha chikito y lagando varios persona herida, algun di nan a keda pa bida marca despues di e accidente horibel aki.

Bida di hende no tabata tin mucho balor
E tempo ney bida di hende, bida di un criatura di 7 aña y mama di 30 aña no tabata tin mucho balor. E chauffeurnan burachi no tabata worry cu nada, pasobra si nan desgracia un hende of mata hende toch e castigonan tabata hopi abou. Un aña di castigo di prison pa kita bida di un mucha cu tabata tin full un bida su dilanti, kita bida di un mama di 30 aña cu probablemente a laga su casa y mas yiu atras. Hopi tristo e sucedido aki tabata.

Chauffeur bou influencia ta un peliger grandi riba caminda.
Nos ta na 2021 casi 75 aña despues y danki Dios cu si polis haya un chauffeur bou influencia, e ta wordo kita for di riba caminda, pa su siguridad y di otro, e ta wordo deteni. Esaki pa no dun’e chens di desgracia of mata un persona inocente of su mes. Polis na Aruba tur dia ainda ta sigui detene chauffeurnan iresponsabel, cu ta subi tras di stuur bou influencia di alcohol.

Den historia di accidentenan fatal mayoria tabata pa motibo di chauffeur bou influencia.  Cada chauffeur bou influencia ta un peliger grandi riba caminda.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio