Home » Historia di Aruba: Un gran politico na Aruba, a wordo asesina cruelmente pa un persona cu e la duna di come, bebe y a dun’e luga di drumi

Historia di Aruba: Un gran politico na Aruba, a wordo asesina cruelmente pa un persona cu e la duna di come, bebe y a dun’e luga di drumi

by Admin
0 comment 245 views

Historia di Aruba, E biaha aki e ta poco mas largo cu normal pero lese te na final pa haya sa mas di e “misterio”.

Nos a dedica e historia aki na un gran Arubiano, un politico, defensor di e obreronan y di e naturalesa di Aruba. Un persona cu tabata tin hopi amor pa su isla, hopi ambicion, a skirbi buki, skirbi letra pa cancion y varios articulonan cu a keda publica den corantnan di antes, pero lamentabelmente na aña 1977 destino tabata tin un otro plan pa e gran persona aki. Den un forma hopi cruel y tristo e la wordo asesina, su asesino tabata un persona cu e la saca man yuda, pa despues e wordo paga cu morto.

Jose Geerman a nace riba 19 di maart 1917, como hoben e la bay traha na L.A.G.O.,  pero hopi lihe Jose a ripara cu e tin un ambicion grandi den su bida, cual ta drenta den politica.

Na aña 1949, e la tuma e reto grandi aki, durante su carera como politico e la ocupa varios funcionnan halto, entre otro deputado di Aruba, Miembro di Staten di Antiyas, Miembro di Eilandsraad di Aruba.

Su prome elecion tabata dia 17 di maart 1949, un elecion cu tabata hopi importante y unico pa Aruba.
Pa prome biaha cu Jose Geerman a bay riba un lista politico tabata e elecion di 17 di maart 1949. Un elecion completamente diferente na Aruba. Esaki tabata pa dos motibo, e elecion aki pa prome biaha e ser femenina biba na Aruba, por a eherce su derecho di vota y alabes nan por a postula nan mes tambe como candidato riba e partidonan politico. Señora Laura Wernet Paskel dfm tabata e dama cu a bringa pa muhenan na Aruba haya e derecho di voto y alabes tabata e prome dama cu a subi un lista politico.

E otro motibo hopi importante tabata cu e elecion aki, di tres representante den Staten di Antiyas, Aruba a logra haya 8 asiento, mes tanto cu Corsou, den e Staten nobo di Antiyas.

Jose Geerman a bira miembro di Staten di Antiyas
E dia di elecion mas cu 10 mil persona biba na Aruba a bay eherce nan derecho di voto, E resultado tabata A.V.P. a logra haya mayoria di asiento cu tabata 5 asiento y U.N.A. a haya tres asiento. E candidatonan cu a wordo escohi pa A.V.P. pa representa Aruba den e Staten di Antiyas, tabata Sr. J.Henny Eman (Henny bieu), Juan Irausquin, Porfirio Croes, Moses De Cuba y Jose Geerman. E otro tres representantenan tabata di U.N.A. tabata Felepito Tromp(ex gobernador), Dr. Dussenbroek y Mario Arends.


Na augustus 1951, Jose Geerman a bira deputado di Eilandsraad y no por a keda ocupa e puesto di miembro di Staten di Antiyas y a wordo remplaza pa Dr. De la Fuente.

 

Despues di e kiebro den A.V.P., un grupo cu tabata riba lista di A.V.P. a bandona A.V.P. y a lanta P.P.A., hopi hende tabata specula e posicion di Sr. Jose Geerman, pero Shon A Eman na 1955 a bisa bon cla cu Jose Geerman ta un candidato fiel di A.V.P. y cu sigur no lo bandona e partido, Avp. E resultado di e elecion e aña ey, A.V.P. a haya dos asiento so den Staten di Antiyas, e dos asientonan aki a wordo ocupa pa Shon A Eman y Jose Geerman. Jose Geerman mester a retira prome como deputado pa por a ocupa e puesto di miembro di Staten di Antiyas.

Na October 1957, Jose Geerman a bira malo y mester a bay Caracas pa un siman pa tratamento medico.

Jose Geerman a bandona A.V.P. y a join P.P.A.
E aña 1958 no tabata un aña facil pa Jose Geerman, despues di casi 10 aña di tabata un politico hopi activo den e fila di A.V.P., e la dicidi di distancia di e partido aki y join P.P.A.

Sr. Geerman a bisa bon cla cu e por steun gobierno, pero e mester por cumpli cu e deseonan di e obreronan. SI no e no por steun e gobierno aki.

Na augustus 1962, Sr. Geerman despues di elecion a dicidi di no acepta e puesto di miembro di Staten di Antiyas mas y a bay Hulanda, cu verlof. Sr. Jacobo “Coco” Erasmus a tuma e puesto di Miembro di Staten di Antiyas.

Preocupacion pa e desempleo creciente
Sr. Geerman durante un reunion di eilandsraad na 1963, a pidi Gobierno pa no hunga politica di avestrus, pero e tabata sa bon cu Gobierno no lo stroba LAGO di introduci 40 ora di trabou pa siman, pa su trahadonan. Sr. Geerman tabata mas preocupa cu e desempleo creciente e tempo ey, pa motibo cu LAGO tabata lay off hende, durante reunion e la haci un pregunta si acaso e trahadonan cu a perde trabou na LAGO, no lo por bay traha na Hulanda. E opcion aki tabata simplemento un sugerencia, pa motibo cu e tempo ey, no tabata tin suficiente trahado na Hulanda y madre patria tabata importa trahado for di Spaña, Italia etc.

Entrega di un peticion pa 40 ora di trabou pa siman
Jose Geerman  hunto cu mas miembro di fraccion di PPA, na 1964 a entrega un peticion na e voorzitter di Eilandsraad pa introduci 40 ora di trabou pa siman, pa tur obrero y tambe tur e trahadonan di gobierno. Pa haci esaki mescos cu recientemente a wordo introduci pa LAGO y SHELL.

Na fin di 1964 Sr. Geerman a bira malo y prome siman di januari 1965, e la wordo interna na Hospital, dia 20 di Januari 1965, e la sali for di hospital, pero e tabata tin mester di hopi sosiego.

Reunion di presupuesto 1965
Durante tratamento di e presupuesto diamars 9 di februari 1965, Sr. Geerman ferozmente a expresa su mes, pa locual Hulanda tabata haci cu Antiyas, e tempo Hulanda tabata haci hopi dificil pa financia proyectonan na Antiyas, nan no tabata aproba tur proyecto di biaha, pero nan tabata studia cada proyecto apart y tabata dura masha hopi pa cada proyecto wordo financia. Pero ora di financia otro pais, nan no tabata haci asina dificil. Sr. Geerman a pidi pa Antiyas pone un representante ” estilo watchdog na Hulanda y na Brussels pa percura cu e financiamento bay mas lihe.  E la propone na gobierno pa tur hende traha 8 ora pa dia y maximo 45 ora pa siman, ” tempo di catibu a pasa”. E la pidi Gobierno di Antiyas institui mas pronto cu ta posibel un comision pa stipula e Grammatica, Ortografia y Vocabulario di papiamento, pa motibo cu su persona ta skirbiendo un buki y ainda no tin reglanan pa skirbi papiamento. Tambe e la pidi gobierno pa haci algo cu e tarifanan hopi halto di electricidad y hopi mas punto valioso cu e la trece dilanti pa trata na logra e felicidad y tranquilidad na Aruba.

Jose Geerman como escritor
Señor Geerman tabata tin varios hobby y un di nan tabata skirbi. Na April 1965, Jose a skirbi un buki, e titulo tabata  “Juancho di Rooi Spokie” e la splica bon cla cu e buki no tin nada di haber cu politica, pero su amor pa e folklor, e cultura  di Aruba.  Na 1961 e la yega di skirbi un articulo cu a keda publica den Simadan, e titulo di e articulo tabata “Awa cero y maishi rabo”.  Durante hopi aña e tabata colecta informacion pa skirbi un buki, su intencion tabata pa publicanan despues cu e bay cu pensioen, pero e no por a warda asina hopi mas. Gezaghebber di e tempo ey Sr. O. Henriquez a haya e prome exemplar pa lesa.

Invitacion di Gobernador Debrot
Diadomingo 24 di oktober 1965 Gobernador di antiyas di e tempo ey Señor Debrot, a invita algun escritor local pa un encuentro cu su persona kende tambe ta un escritor.  Cada invitado a presenta na Gobernador nan bukinan.  Jose Geerman tambe tabata un di e invitadonan, e no tabata solamente un politico, pero un escritor Arubano tambe.

“Oh Lovely Moonlight” un poesia cu a wordo uza como letra pa un cancion
Jose Geerman, banda di tabata un politico, un escritor di buki y articulo den corant, tabata tin mas talento, entre otro di skirbi letra pa cantica. Jose Geerman, te hasta a yega di haya un oferta for di un compania discografico Mericano, pa un cancion cu ela composita ” Oh lovely Moonlight” tambe nan a pidi Geerman pa manda mas composicion di cantica.

“Oh Lovely Moonlight”, a wordo skirbi 30 aña prome pa Jose Geerman como un poesia tocante Moonlight, e poesia aki a wordo traduci na ingles y  a wordo uza como letra di un cancion. Ela manda esaki pa e compania discografico. E prome persona cu a canta e cancion aki tabata Ernie Susser y esaki a wordo graba riba disco como prueba y a wordo manda pa e compania mericano. E compania tabata dispuesto pa graba e disco aki, pero a conseha Geerman pa busca un cantante mas conoci pa canta e cancion aki.

Un proyecto di Jose Geerman “Masiduri”, su amor pa e naturalesa di Aruba
Na Januari 1967, un grupo di miembro di Eilandsraad a haci un bishita na e herbebossing proyect na Miramar. E herbebossing proyect tabata inclui cu annualmente lo planta entre 2 mil pa 3 mil mata. E proyecto tabata mustrando hopi exitoso, mirando cu 80 porciento di e matanan a logra crece. Pa evita cu cabrito ta come e matanan, nan tabata wordo protegi pa barinan di zeta.

E  ultimo parti di e bishita di e miembronan di Eilandsraad, tabata Masiduri. Masiduri tabata un lugar hopi stima pa Jose Geerman. Jose Geerman a inicia e proyecto aki y su intencion tabata pa haci e area aki un natuurreservaat, caminda e flora y fauna hunto lo por wordo protegi.

Na 1964 Señor Geerman como hefe di werkverschaffing a cuminsa cu e proyecto di Masiduri, conhuntamente cu e trahadonan di Werkverschaffing. Sr. Geerman su amor, aprecio y e empeño pa perserva e naturalesa di Aruba tabata hopi grandi. Jose Geerman kier a perserva e Aruba di antes pa futuro generacionnan. E amor grandi cu e tabata tin pa Aruba su naturalesa, a haci’e cuminsa cu e proyecto aki y hopi lihe a bira exitoso.

Jose Geerman hunto cu e trahadonan di Werkverschaffing a haya un tereno di 60 hectare, prome stap tabata pa cera e tereno aki bon. Despues cu nan a haci e tereno aki limpi, nan a cuminsa planta matanan di Aruba. Tambe nan a traha un cas di torta y a pone varios articulonan di antes den e cas.

 

Na 1967 tabata tin 1397 mata riba e tereno di Masiduri, di cual tabata tin almendra, guyaba, barba di joncuman, sorsaca, rucu, Karawara Spaño y varios otro mata tambe.

Durante e bishita orguyosamente Sr. Jose Geerman a mustra su coleganan e mata di Eucalyptus cu e la manda busca for di Australia y cu tabata creciendo bon na Aruba.

Sin lubida cu riba e tereno na Masiduri tin como 22 sorto di parha.  Wawoe, totolica, barica geel, moffie, Gonzalito, chonchorogai etc. Segun Geerman, Masiduri a haya   hopi atencion di LAGO y e idea tras di e proyecto aki tabata pa cuminsa trece e muchanan di scol na Masiduri pa asina siñanan mas di Aruba su naturalesa y e Aruba di antes.

Jose Geerman a keda deteni, despues di accidentalmente a tira riba un hoben
Diasabra 28 di october 1967, tabata un dia scur den bida di Sr. Geerman. Den oranan di merdia Jose Geerman a dicidi di bay dal algun drinks na un lugar na San Nicolas, e bario caminda e tabata biba. Jose Geerman despues di algun drinks a lanta pa bay paga su cuenta, aki ta caminda cu a sosode un accidente basta fastioso pa Sr. Geerman. Na momento cu e la hinca man den su saco, pa bay saca placa pa paga su cuenta, pa su mala suerte e revolver cu e tabata tin hinca den su saca di carson, sin cu e por a yuda a los un tiro y a herida un hoben cu ni conoce Sr. Geerman. E hoben A. Angela di 25 aña  a keda herida na e parti abou di su barica. Na momento cu Sr. Geerman a mira sanger, e la spanta y a sali na careda bay.  E hoben a wordo hiba hospital pa tratamento medico, pero despues a resulta cu e herida no tabata serio. Polis a wordo pidi pa haci e investigacion.

Jose Geerman kende tabata e tempo ey tabata un miembro independiente di Staten di Antiyas, un rato prome di e susedido e tabata tin un discussion cu yiu homber di un minister di Antiyas. Despues di un rato polis a bin topa cu Geerman sinta banda di lama na Grapefield. Geerman tabata poco bebi, e la keda deteni pa mas investigacion y diadomingo den careda di 1’or di merdia e la wordo laga den libertad.

Jose Geerman su deseo pa Aruba sali for di e constelacion Antiyano
Na e mesun aña aki, 1967, Jose Geerman kende pa hopi aña tabata pertenece na P.P.A., a dicidi di bira independiente y tabata di opinion cu Aruba mester sali for di Antiyas. Su deseo tabata pa Aruba sali for di e constelacion Antiyano, pero keda den Reino.

Geerman a tuma su retiro for di partido P.P.A.
E tabata mira e futuro di Aruba den Antiyas Hulandes basta scur, Sr. Geerman tabata boga pa un Aruba banda di Corsou y no bou Corsou. Algun miembro di PPA a firma un acuerdo, sin consulta cu su persona, esaki tabata e motibo principal pa e la retira for di P.P.A. Segun su persona cu locual nan a firma, Corsou lo por tuma un posicion mas dominante contra Aruba. Esaki pa su persona sigur ta algo inaceptabel. Durante un reunion e la bisa, ” Pa loke ta trata Aruba, mi por asegura cu e repartimento di asientonan di gobierno di antiyas, lo ta e motibo principal pa den futuro desolve Antiyas Hulandes for di otro. Futuro lo demostra locual mi ta bisando.” Y despues di basta aña señor Geerman a haya rason.

Na Aruba, e retiro di Sr. Geerman for di P.P.A. sigur no a bin como sorpresa, paso Sr. Geerman ta conoci pa expresa su mes y tabata wordo mira como e zorgenkindje di P.P.A. caba, e tabata duna un impression di ta un politico cu no tabata baila riba tur tono.

“Hot Latin Blood”, otro buki mas skirbi pa Jose Geerman
Na 1968, Jose Geerman cu e uitgeverij Carlton Press Inc. na New York a pubica un buki yama “Hot Latin Blood” , e buki aki ta bay over di dos famia na Aruba. E buki aki su meta tabata pa e lesadonan haya sa mas di e bida diario di famianan na Aruba. E buki ta describi tambe e isla y su habitantenan. Esaki no tabata e unico buki, paso e tempo ey Geerman tabata trahando riba un buki di Antiyas hulandes, cu ta cuminsa cu e Ronde Tafel Conferentie. Carlton Press Inc,a describi Jose Geerman como un persona cu a biaha hopi, cu a conoce mundo y ta papia 4 idioma.
Jose Geerman a sigui un curso di Journalistiek na Newspaper Instituut na Merca y tambe a bay curso na Bennet College.

Jose Geerman a retira pa semper for di politica
Sr Jose Geerman na Juni 1969, a dicidi di retira for di politica, despues di 20 aña di tabata un politico basta activo riba A.V.P. y despues P.P.A. Jose Geerman a subi riba lista di A.V.P. na Maart 1949 y semper a sali na defensa di e homber chikito, e obrero, e naturalesa di Aruba etc.
Na Juni 1969, Jose a dicidi di retira pa motibo di salud, e no por a sigui sirbi e pueblo mas y a gradici Aruba, muy en particularmente Antillas Hulandes y tur otro persona pa a dun’e un chens di por a sirbi Aruba y Antiyas. Aruba como eilandsraad lid y deputado. Pa Antiyas Hulandes pa a forma parti di Staten di Antiyas.

Jose Geerman, Un amante di Naturaleza
Jose Geerman como un persona cu ta stima naturalesa a keda activo skirbiendo articulonan pa publicacion den corantnan. Entre otro un articulo cu e la skirbi, na Juli 1971, den cual e la expresa su rabia y dolor, mirando con LAGO tabata haciendo cu e poco naturalesa cu Aruba tin.

Segun su persona LAGO y Shell tabata manda riba Antiyas Hulandes, na varios ocasion e la critica esaki caba y ta hayando dia pa dia mas rason. LAGO a daña e costa di Aruba, Segun e la skirbi den su articulo ” Prome a deposita resto di azeta y haci tur nos costa blanco preto preto. LAGO a carga santo blanco for di nos costa manera nan ta haya ta bon, no a tene cuenta cu e matanan di druif y ni cu nos naturalesa.

 

E la sigui reclama cu Gobierno a duna LAGO un tereno pa traha un refineria, pero no pa haci y deshaci. Segun su persona LAGO a dempel e lagoen na Baby Beach, caminda e piscadonan di San Nicolas tabata bay coy haas, tur e piscanan aki a muri.” Den su articulo e tabata roga autoridad pa bay mira kiko ta pasando cu e lagoen. Segun su persona LAGO a destrui e naturalesa por completo, como un persona cu ta aprecia e poco naturalesa cu Aruba tin, e la pidi pa stop di laga LAGO di sigui haci y deshaci cu e beachnan di San Nicolas, pa nan stop cu e practica destructivo aki.

Na final di su articulo e la bisa “Laga nos tur juda spaar un poco di e naturaleza cu nos tin! Autoriad y pueblo di Aruba.. Man na Obra!” Jose Geerman
Un amante di Naturaleza.

Jose Geerman, un consehero, un persona critico
Na 1974, e la acerca Betico Croes y Sr. Watty Vos kende e tempo ey tabata Minister, ambos a haya un telegram for di Jose Geerman den cual e ta  pidinan pa interveni contra tur cu ta trapando of kier trapa riba derecho di e obreronan.

Jose Geerman formando parti di e comision di 18 di maart 1976, institui pa Gobierno di Aruba
Na cuminsamento di Maart 1976, e deputado di e tempo ey Sr. Nelson Oduber a instala un comission pa prepara y hinca un programa den otro, pa e celebracion di 18 di maart, na Stadion caminda a presenta e bandera y e himno oficial di Aruba.

E comission tabata consisti di 13 persona entre otro, Godfried “Fifi” Eman como Presidente, Julio Maduro como vice presidente, Rufo Odor, Albert Eman, Holmo Henriquez, Maybelline Arends Croes, John Merryweather, Atan Lee, Rafael Estrada, Milo Croes, Augusto Croes y Jose Geerman.

Pastoor Hendrikstraat, San Nicolas:  Diasabra 5 di januari 1977, den oranan di mainta e curpa sin bida di Sr. Jose Geerman a wordo haya den su cas drumi riba un sofa. Sr. Geerman tabata tin 59 aña, E la wordo severamente maltrata cu un bloki y a fayece. E noticia aki a core hopi lihe rond di Aruba. Dilanti su cas tabata tin un multitud grandi di persona cu a bay mira pa nan mes kiko tabata pasando.

Hopi lihe a detene un sospechoso
Na prome instante autoridad no kier a duna mucho informacion encuanto e causa di su morto, pa motibo cu nan tabata bezig cu investigacion. E noticia di e morto di Señor Geerman a crea un consternacion grandi den e pueblo di Aruba. Hopi lihe a logra detene un sospechoso.

Diadomingo 6 di Februari den careda di 6’or di atardi, Polis a detene R. Nicolaas como sospechoso den e caso di asesinato di Jose Geerman. R. Nicolaas pa algun aña atras tambe tabata riba lista como candidato pa e grupo di hobennan y regularmente por a mira R. Nicolaas den compania di e victima. E la keda deteni pa interogacion.

Dos persona mas deteni como sospechoso
Diadomingo pa dialuna e recherchenan cu tabata encarga cu e caso aki, a logra detene dos persona mas, cual ta M.H. y H.K. Mientrastanto e sospechoso R. Nicolaas a keda para ariba cu e no tin nada di haber cu e asesinato di Jose Geerman. E investigacion a sigui cana su caminda.E sospechosonan rM.H. y H.K. pa falta di purba nan a wordo laga hopi lihe bek den libertad.

Entiero di Jose Geerman
Diahuebs 10 di Februari 1977, a tuma luga e entiero di Jose Geerman, esaki tabata den careda di 4’or y mey di atardi, cu e la wordo hiba na su ultimo luga di sosiego. E entiero di Geerman tabata un entiero cu a haya hopi hende, hopi amigo y conocirnan di Jose a hibe na su ultimo luga di sosiego, cu ta e santana catolico na San Nicolas. Na e entiero por a mira, entre otro Betico Croes, Marco Bislip, Hilario “Lala” Angela y ex miembronan di Staten Ernst Finck y Fabian Kelly. 

Confesion di e prome sospechoso R. Nicolaas
Diabierna 18 di februari, porfin e recherchenan a haya un confesion di e sospecho R. Nicolaas, cu hopi lihe despues di e asesinato di Jose Geerman a keda deteni. E la confesa cu na un forma hopi violento y cruel e la asesina Jose Geerman. Maske cu Recherchenan ya a haya un cantidad grandi di pruebanan tecnico contra Nicolaas, entre otro vingerprint riba un camisa di e sospechoso cu rastro di sanger humano.

Esaki a wordo manda pa Gerechtelijk Laboratorium di Prof. Froenjes na Den Haag. Potret di Prof. Froenjes

Dr. De Witte, kende ta e specialista di Sanger a informa autoridad local, cu e manchannan riba e camisa ta di sanger humano. Maske na prome instante e sospechoso a keda nenga, Dialuna 21 di februari 1977, e la confesa di a asesina Jose Geerman.

Prome biaha cu e caso aki ta wordo atende den corte
E la keda casi un aña cera prome cu su caso a bin dilanti. Diabierna 3 di februari 1978, e mester a presenta den corte. Fiscal a exigi 20 aña di castigo di prison, cuminsando for di e dia cu Nicolaas a wordo deteni cu ta 6 di februari 1977, esaki tabata e exigencia di Fiscal contra R. Nicolaas.

E acusado R.Nicolaas cu na comienso di su detencion a admiti su culpabilidad, pero despues a cambia su declaracion, den corte a keda persisti cu e ta inocente. Hues su siguiente siman a keda di duna sentencia.

E caso aki a haya hopi atencion di pueblo y tambe di e alumnonan di scol di polis. E caso a wordo trata extensamente, tur e sucedidonan a wordo describi for di e anochi prome cu e asesinato. Tur e declaracion di e acusado, di e testigonan y tambe di e 4 recherchenan cu tabata encarga cu e investigacion di e caso aki a wordo scucha.

E acusado R. Nicolaas a wordo condena pa morto, subsidair doodslag, subsidair maltrato severo, cometi premedita cu morto como consecuencia. Subsidiair maltrato cometi cu un arma.

Descripcion di e susedido, durante tratamento den corte.
E caso aki pa e tempo ey, tabata un di e casonan mas complica y dificil den historia di Aruba y alavez misterioso. Especialmente si considera e asesino un persona cu e victima a duna di come, bebe y un luga di biba. Segun e acusado Nicolaas, e la admiti di a asesina Jose Geerman pa motibo cu e la wordo poni bou pression, castiga y golpinan cu e lo ricibi a pone cu e la firma, pero en realidad e ta inocente.

Fiscal Arps di e tempo ey tabata convenci cu R. Nicolaas ta e asesino
Fiscal Arps a acusa R. Nicolaas di a asesina intencionalmente y segun un plan prepara di antemano pa mata Jose Geerman den su cas, mientras e tabata drumi den su sofa.
Segun fiscal, Nicolaas por a drenta e cas ya cu te cu un siman prome cu e asesinato e tabata biba den e cas aki y e cachonan conoce su persona caba y no lo blaf e. E tabata mescos cu un yiu pa Jose Geerman. E la kita dos shutter banda pariba di e cas y a drenta paden, e la haya Jose drumi riba un sofa den su sala, Nicolaas a comete e crimen cu un bloki of algo por estilo, e slanan cu Jose Geerman a ricibi tabata na e parti robes di su cabes y esaki tabata fatal y mas sigur Jose lo a muri al instante.

Durante investigacion a bin topa cu restonan di cement na su heridanan, e cement aki lo mester ta di e bloki cu a wordo uza pa agredi señor Geerman na su cabes. E bloki mes, cu a wordo usa pa asesina Geerman, cual lo mester tin sanger y cabey na dje ainda, no a wordo haya.

Autoridad a haya un spoor di un vingerprint di un duim di R. Nicolaas na momento cu lo a saca e shuttersnan di e bentana, pa drenta paden. Nicolaas a contesta cu esaki a pasa na momento cu e la bay mira paden.

Tur investigacion ta mustra cu Nicolaas mes ta e asesino
E raport di specialistanan tecnico a confirma cu e vingerprintnan haya, ta cuadra cu esun di e Nicolaas. E fiscal a mustra tambe cu a haya algun mancha chikito di sanger riba e paña cu Nicolaas a bisti e anochi aki. E abogado di R. Nicolaas a puntra si e pruebanan ta convence hues. E abogado a puntra cu si e declaracionnan di e polisnan ta prueba suficiente, segun e abogado, lastimamente cu na Aruba nan no por ni bisa exactamente ki ora un persona lo a fayece.

Dia 10 di februari 1978, R. Nicolaas a sali liber di tur acusacion
Riba 10 di februari 1978, Hues a dicta sentencia y R. Nicolaas di 28 aña a gana su caso, e la haya vrijspraak. E siman anterior durante e tratamento di e caso den corte, Fiscal a exigi 20 aña di castigo di prison y un siman despues den oranan di mainta Hues a haya cu e ponenciana contra R. Nicolaas, no ta legal y e pruebanan no ta convence su persona. Mientras cu R. Nicolas a wordo laga den libertad, fiscal a bira apela.

Fiscal mesora a apela, despues di a scucha e sentencia di Hues
Fiscal a apela, mesora despues di a scucha e sentencia di Hues den cual a duna R. Nicolaas vrijspraak. Fiscal su motibo tabata  cu e sospechoso aki no tin un lugar fiho di biba y ultimo lo tabata biba den grotnan na San Nicolaas, pa ta sigur cu e acusado ta  bon na altura di e apelacion aki y tambe e la wordo mesora poni riba papel y firma pa e acusado.

R. Nicolaas a keda algun luna den libertad y lo mester a presenta den corte na November 1978, pero Hof a bolbe restrasa e tratamento di e caso di asesinato di Sr. Geerman, e rekmento di e caso tabata tin di haber cu e abogado nobo di R. Nicolaas. Abogado Sjiem fat tabata tin mester mas tempo pa studia e caso.  Durante e prome caso den corte  Nicolaas a wordo representa pa abogado Tjong Ajong, den cual hues a dun’e vrijspraak.

Procureur General a duna ordo pa mesora detene  R. Nicolaas
Na momento cu e caso a keda posponi, Procureur General a duna ordo pa detene y cera R. Nicolaas te ora su caso bin dilanti riba e fecha nobo di 23 di januari 1979.

Dia 23 di januari 1979, durante e tratamento di e caso Procureur General tambe a keda para riba 20 aña di castigo di prison cu anteriormente fiscal tambe a pidi pa R. Nicolaas, kende e tempo ey a cumpli 29 aña.

E Procureur General ta haya cu ta prueba cu Nicolaas a asesina e ex politico, ex miembro di Staten Jose Geerman riba 5 di februari 1977 den su cas na Pastoor Hendrikstraat. E victima a wordo haya riba e dia aki den careda di 11’or di mainta, morto den un sofa. Segun raportnan di expertonan e lo a wordo asesina den careda di 4’or di marduga.

Procureur General a baha pisa riba Nicolaas
P.G. den corte a resumi tur locual a sosode for di dia 5 di februari 1977. Procureur General a ilustra tur e pruebanan cu nan a acumula contra Nicolaas demostrando su culpabilidad, entre otro e hecho cu riba e shuttersnan di glas a haya su fingerprints. E la saca e shuttersnan pa drenta den e cas di e victima, esaki segun expertonan.

Tambe riba e jacket cu Nicolaas tabata tin bisti e anochi aki, nan a haya mancha di sanger cu ta cuadra cu e mesun sanger cu a wordo haya na e muraya den e cas di Jose. Nicolaas a bisa cu dia 24 di januari 1977 despues cu e la haya un pleito cu  Jose, na e cas di Jose, su persona  no a bolbe mas na e cas aki.  P.G. tabata tin duda den esaki.

E vingerprintnan riba e shuttersnan, segun e expertonan no ta mas bieu cu 1 of dos dia. P.G. a sigui bisa cu e ta haya cu un persona a wordo mata den un forma hopi inhumano, mientras cu e victima tabata simplemente drumi trankil den su cas. E victima nunca lo por a biba pensa cu un hende, cu e la duna di come, bebe y un luga di biba por a hasi algo asina cu ne. Pa e motibo aki P.G. a exigi 20 aña di castigo di prison.

Abogado Sjiemfat pa dos ora largo defendiendo su cliente
Abogado Sjiem Fat, e abogado defensor a hiba un defensa cu a dura dos ora y tabata hopi interesante. Segun e abogado e fingerprintsnan nan por ta di paden tambe y no necesariamente ta di pafo. muy bien por ta ora e lo por a habrinan, mirando cu e acusado a biba den e cas aki y regularmente tabata haci e shutternan limpi, segun e abogado Nicolaas mester a press riba nan paso tin di e shuttersnan aki cu no ta habri facil.

Abogado defensor a lubida un aspecto hopi importante cu den e raport di e patholoog anatoom, no ta poni ki ora e victima a wordo asesina. E abogado a bin cu un declaracion di un testigo H. kende a bisa cu e anochi di 4 di februari 1977, H. a prepara cuminda pa Geerman, esaki den presencia di e homber di fam Q. kende a keda un rato mas mira baseball na Television y despues a bay su cas. Segun e abogado, e victima a keda su so cu e testigo H. y cu Jose Geerman mientrastanto lo por a pega soño tambe. E abogado ta haya cu den e proces verbaal no tin nada concreto cu no ta descarta cu e asesinato lo por a tuma lugar riba 4 y no 5 di februari 1977. E la sigui bisa cu niun hende no por sospecha cu e homber H. tambe lo por a comet’e e asesinato aki y despues bay su cas. Aki tin posibilidadnan real cu e dos personanan aki tambe lo por a asesina Jose Geerman. Despues e abogado a sigui riba explicacionnan di e diferente raportnan traha den cual entre otro vingerprint por keda basta largo marca.

Abogado Sjiem fat pidiendo pa laga su cliente den libertad
Por ultimo e abogado a haya cu tin hopi duda di e culpabilidad di su cliente y a pidi Hof pa laga su cliente den libertad. Despues cu Huesnan a retira pa delibera un rato riba e peticion di e abogado Sjiem Fat, e presidente di Hof a bin bek bisando cu hof a rechasa e peticion di abogado Sjiem Fat, Nicolaas ta keda cera. Segun e abogado su cliente a firma su culpabilidad despues di a wordo maltrata pa dos ora largo door di polis y durante e reconstruccion e la wordo bisa kiko e mester haci.

E acusado a conta kiko tur e la haci riba e dia di 4 pa 5 di februari 1977
Den corte na momento cu hues a puntra R. Nicolaas si e ta culpabel di a asesina Señor Geerman, e la contesta cu e no a mata Jose Geerman. E la conta cu dia 4 di februari 1977 e tabata na su cas na Zeewijk, hunto cu e doño di e cas, cu ta famia Maduro y cu algun amigo di e famia, nan a sinta henter dia na cas dal betro e.o nan a bebe brandy, despues nan a sigui cu rum.

E acusado a pasa varios caminda y a topa varios amigo
E acusado a sigui conta cu mas den oranan di atardi, e la sali bay dal un keiro den e caya principal di San Nicolas. E tabata bashi y tabata tin solamente 5 pa 10 florin cu ne. Entre 8 ‘or y  8’or y mey ela bay bishita un bon amigo un tal Iri kende ta un meneer di scol y supuestamente e tabata yudando Nicolaas skirbi un buki. Su amigo Kock a yude cu 3 florin. Aki hues a remarca segun e raport di reclassering Iri a declara cu ela mira Nicolas despues di 11’or. E acusado a keda insisti cu e meste tabata prome cu 9’or paso Weg Fontein Rumshop ta cera 9’or. Segun Nicolaas ta na weg Fontein Rumshop e la bay cumpra un botter di rum. Prome cu ela bay di Iri su cas, e la bay cumpra dos cerbes pa nan bebe. E acusado a bisa cu banda di 9’or e la bay bishita un amigo di dje Jossy na weg Fontein, pero e no tabata na su cas. E lo a bay busca placa fia cerca Jossy. Despues cu e la sali for di Jossy su cas e la sigui, e la bay cumpra un botter di rum y dos coca cola. Na caminda e la topa bin topa cu Daal, Marcelo, Rombley y Arends y Oiky. Nan a manda dos of 3 rond, e la bebe dos of tres Cerbes. Na e momentonan ey ainda e tabata tin e botter di rum y e dos coca colanan.

E acusado a conta cu despues di mey anochi e la bay dal un keiro den centro di San Nicolaas
E la sigui conta cu unda cu e la bay e tabata den compania di sr. Kappel. Den careda di 11’or Kappel a bira burachi y e la hibe su cas. Na e cas di kappel e la dal 3 sigaria. Den careda di mey anochi e la bay bek den centro di San Nicolas, pero prome cu esey e la pasa su cas cambia paña. E la bisti su jacket di jeans pa motibo cu den e temporada ey anochi ta bira mas frieu.

Bebiendo, topando amigo, tambe bendiendo y dealmento di marihuana
Den e centro nocturno di San Nicolas durante su bueltanan den e cayanan, tur caminda e tabata topa cu amigonan, na China Clipper e la topa cu Joy, despues e la bay na Tropicana, e tabata tin poco marihuana cu ne y a haci deal di marihuana, asina e la haya 5 dollar plus 10 florin. Hues a remarca cu Joy a declara cu ta cu un papel di 25 fls e la paga, Nicolaas a nenga te cu e la bisa hues, cu e la fia Joy 5 florin.

Asina segun su persona su anochi a sigui bebiendo alcohol, topa cu su amigonan, bendiendo su marihuana y haci deal pa bende mas marihuana, paso e no tabata tin tur e marihuana riba dje, pero na su cas e tabata tin mas.

Segun su persona e la pasa cu un amigo den Pastoor Hendrikstraat


Segun su persona despues cu e la caba di keiro den Centro di San Nicolaas, e la pasa den Pastoor Hendrikstraat, e tabata acompaña pa un amigo y segun un testigo enberdad nan a mir’e cu un amigo pasa den Pastoor Hendrikstraat, pero kiko a sosode exactamente e marduga di 5 di Februari 1977 a/ta keda un misterio.

Riba 13 di februari 1979, hof a sentencia R. Nicolaas cu 15 aña di castigo di prison


Un cos ta sigur, for di investigacionnan haci a sali na cla cu e paña cu e la bisti e anochi aki, tabata na sanger humano, e mesun sanger cu tabata gespart na muraya den cas di Jose Geerman. E parti di Pastoor Hendrikstraat pasa banda di cas di Jose Geerman pa bay su cas na Zeewijk, con y kiko a pasa keda misterio. Riba 13 di februari 1979, Hof na Corsou a dicta sentencia, e acusado R. Nicolaas a keda condena na un castigo di prison di 15 aña. Maske cu Procureur General y Fiscal Arps a pidi 20 aña di castigo di prison pa e asesinato aki, pero Hof no a haya cu tin prueba di asesinato, pero si a conclui cu ta trata di homicidio den cual riba 5 di februari 1977 Jose Geerman a bira e victima. Pa e motibo aki R. Nicolaas a haya 15 aña di castigo di prison.

E aña aki a haci 44 aña cu Jose Geerman a bay sosega, nos di arubanative.com, nunca a conoce Sr. Jose Geerman y ni su famia, si e tabata casa, divorcia of si e tabata tin un famia. Tampoco nos no conoce e asesino, di fam Nicolaas si e ta bibo ainda, ni si e ta na Aruba . E ta un susedido cu lo bay den historia como un caso misterioso y dificil pa compronde. Den nos investigacion nos no a encontra e motibo real pakiko Nicolaas lo por a asesina Jose Geerman.

UPDATE 28 februari 2021:
Na 1971, Jose Geerman, su ruman homber Simon Geerman tabata riba e prome lista di MEP, Betico e tempo ey semper tabata bishita Jose Geerman pa conseho y guia, como cu e tabata un politico grandi den su tempo. Alabes e tambe tabata un persona cu tabata kier a mira su isla liber, como partner igual den Reino Hulandes y no manera tempo di Antiyas bou di Corsou.

R. Nicolaas a sinta su castigo te na aña 1988, despues a bay biba na Hulanda y na mei di aña 2005, e la wordo cruelmente asesina.

Update: 5 maart 2021
Sr. Jose Geerman tabata casa cu Sra. Marina de Veer y hunto nan a haya tres yiu, dos homber y un muhe.

Gobierno di Aruba na 1995 a inicia un proyecto cu tabata un plan di e gobierno anterior, pero cu a keda para. E proyecto tabata nombra cayanan na baluartenan di Aruba. Riba 7 di september 1995, gobierno di Aruba a cambia e nomber di Congoweg pa caya Jose Geerman.

Investigando y lesando informacionnan nos por a conclui cu Jose Geerman, tabata mustra di tabata un persona cu un caracter fuerte y tabata para na banda di e homber chikito, tambe e tabata un defensor di nos naturalesa, e tabata stima Aruba, su tradicionnan, su cultura etc. E tabata un persona cu kier a mira su isla keda perserva. Jose Geerman no tabata solamente un politico, pero un escritor, defensor di Aruba, un persona patriotico y tabata para pa locual e ta kere aden. Jose Geerman no tabata tin miedo di expresa su mes, pero di otro banda e tabata un persona humano cu a duna un otro di come, bebe y drumi y a wordo paga cu morto, un traicion hopi cruel. 

Fuente:Danki na varios persona cu a colabora cu informacion y potret, Amigoe di Curacao, Esso News y hopi mas

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio