Home History of Aruba Historia di Aruba: Riba un dia manera awe 7 di januari

Historia di Aruba: Riba un dia manera awe 7 di januari

SHARE

Algun sucedido cu a pasa riba e fecha di 7 di januari

07 januari 1952

Dos marinier a huy, nan a horta un boto y e boto a wordo haya bandona na costa di Paraguana, Venezuela.

Dos Marinier hulandes di Savaneta a kemp a wordo deteni como sospechoso di un caso di ladronicia, nan tabata cera na Savanetakemp wardando nan caso bin dilanti.

Dialuna e dos mariniernan aki a logra huy, nan a tuma autobus y a baha na altura di Strandhotel (awendia Talk of the Town) aki nan a pasa man pa un boto chikito y nan a drenta waf, hopi lihe nan a pasa man pa un otro boto, cu ta mas grandi yama Santa Maria y a cuminsa nabega bay direccion zuid. Na momento cu a ripara cu e dos mariniernan no tabata den e cel mas y tambe cu Santa Maria no tabata mara mas den waf, autoridad a cuminsa cu un buskeda basta pisa, e Loodsboot y un avioneta a sali en busca di e dos mariniernan y e boto pero sin resultado. Dialuna anochi autoridad a detene un otro marinier cu aparentemente lo mester tabata sa mas di e dos fugitivonan y e boto cu a desaparece.

Su siguiente dia (diamars) e boto Santa Maria a wordo haya dilanti di un beach hopi bandona na Paraguana, Venezuela.
E dos marinier no tabata riba e boto y mucho menos cerca di e boto. E area unda e boto a wordo localisa tabata hopi bandona y hopi dificil pa a sigui busca e dos mariniernan perdi. Via e consulado Venezolano a pidi cooperacion di autoridad Venezolano pa yuda cu e buskeda di e dos marinier hulandesnan aki.
E boto Santa Maria tabata pertenece na Antonio Maduro di Paradera.

Un mucha di 4 anja a fayece despues di a wordo alcansa pa un dumptruck

Dialuna 7 di januari 1952, den oranan di merdia den Bernhardstraat a sosode un accident hopi cruel.
Dos mucha muhe un di 11 y un di 4 aña tabata canando canto di caminda den Bernhardstraat y na dado momento e chikito di 4 aña a kita su man for di e ruman grandi y a core subi caminda, net na momento cu tabata biniendo un dumptruck, e chauffeur a trata na brake pero ya tabata laat. E criatura a wordo alcansa pa e truck y e tire di patras a pasa riba e criatura. E mucha chikito a fayece mesora na e sitio.

07 di Januari 1969: A drenta un noticia hopi tristo, un mucha di 1 anja a fayece despues di a come Happy Cracker, yama “Raspa Bill” cuminsamento di aña.

Un mucha di 1 aña y mey a come Happy Crackers/ Raspa Bill, e criatura a kere cu tabata mangel. E mucha a keda algun dia interna na Hospital como cu e la wordo venena pa e fosfor cu tin den e clapchi y despues a fayece. Esaki tabata un noticia hopi tristo, despues cu e vuurwerk Happy Cracker yama den pueblo como Raspa Bill a wordo bendi como un clapchi cu no tabata peligroso pa mucha. E mucha cu a fayece tabata yama Robustino D. Geerman di Cadushi Largo.

Na Corsou tambe a sosode mescos aki, un mucha di dos anja tambe a muri despues di a come Raspa Bill. Na Corsou na cuminsamento di 1969 tabata tin cuater mucha chikito interna cu tambe lo a come raspa Bill.