1 den 5 pashent di Covid diagnostica cu problema mental

Casi 1 den 5 hende cu a haya Covid-19 ta wordo diagnostica cu un problema psikiatrico manera ansiedad, depresion of insomnia dentro di 3 luna despues di a test positivo pa e virus, segun un estudio cu ta sugeri cu mester tuma accion pa mitiga e daño na salud mental, causa pa e pandemia.
E analisis, haci door di investigadornan di University of Oxford y NIHR Oxford Health Biomedical Research Centre tambe a conclui cu hendenan cu condicionnan mental pre-existente tin 65% mas chance di wordo diagnostica cu Covid-19, asta si no tin otro factor di riesgo presente.
“E conclusion aki ta inespera y mester di mas investigacion. Mientrastanto, e hecho di tin problema psikiatrico mester wordo poni ariba e lista di factornan di riesgo pa Covid-19,” segun Dr Max Taquet, un academico clinico y un di e autornan di e analisis.
E calculacionnan a wordo haci a base di informacion di salud di mas o menos 70 mil paciente, incluyendo mas di 62.000 caso di Covid-19 cu no a rekeri hospitalisacion of bishita na sala di emergencia. E incidencia di cualkier diagnostico mental dentro di 14 pa 90 dia despues di un diagnostico di Covid-19 tawata 18.1%, inclyendo 5.8% cu tawata trata di un prome diagnostico.
Den e prome tres luna despues di un diagnostico di Covid-19, 5.8% di pacientenan a haya nan prome diagnostico di malesa mental, compara cu 2.5% pa 3.4% di paciente den un situacion normal, un riesgo casi 2 biaha mas grandi, segun e resultado di investigacion publica den e revista Lancet Psychiatry.
Paul Harrison, un profesor na University of Oxford, a bisa cu mas investigacion ta necesario pa establece si e diagnostico di un malesa psikiatrico por wordo vincula directamente cu e hecho di a haya coronavirus. Factornan general cu ta influencia salud, manera origen soci-economico, humamento of uzo di droga, no a wordo inclui den e casonan analisa. Tambe ta existi e posibilidad cu e stress general causa door di e pandemia ta hungando un rol.
“Na mesun momento, no ta completamente improbable cu Covid-19 por tin algun efecto directo ariba e cerebro y bo salud mental. Pero mi ta kere cu esaki ainda mester wordo demostra positivamente,” Harrison a bisa.