Home History of Aruba Historia di Aruba: Tragedia riba lama a costa bida di 8 persona

Historia di Aruba: Tragedia riba lama a costa bida di 8 persona

SHARE

Diamars 14 di maart 1972, den oranan trempan di mainta, prome cu salida di solo, den Lama Caribe, 150 miya noordwest di Corsou tabata drief un barco brasilero di carga. E barco di 5 mil ton yama ” Barao de Maua” tabata na candela. E barco lo mester a drenta den oranan mas laat di mainta den e waf di Santa Martha,Colombia, pero na caminda a tuma luga dos explosion abordo y e barco a pega candela.


"Barao de Maua" completamente destrui mara dilanti di e waf
 riba un distancia basta leu

E barconan Cooks y Antonia Johnson a capta e señalnan di S.O.S.
E tripulante di e barco “Barao de Maua” tabata mandando señal di S.O.S. tratando asina pa haya ayudo. No mucho leu tabata tin un barco Sueco cu yama “Antonia Johnson”, e barco aki a capta e señalnan di emergencia y mesora a bay den nan direccion di esaki.

Un otro barco Mericano di Guerra yama “Cooks” tambe tabata basta cerca, ya for di oranan hopi trempan di mainta nan tabata mira hopi huma na horizonte, nan a bay den direccion di e huma. Mientras cu Cooks tabata nabegando, nan ta ricibi un peticion pa ayudo medico, e peticion tabata biniendo di e barco Sueco “Antonia Johnson”. Cooks na su turno a responde y a bay direccion di barco aki. For di leu nan por a mira e barco Barao de Maua completamente na candela, ora nan a yega mas cerca nan a mira un boto di rescate abordo tabata tin 4 persona herida, dos curpa sin bida y 26 persona, entre nan algun cu tabata levemente herida, cu corta y rasca na curpa, nan a wordo informa cu tin un persona perdi riba lama.

E prome auxilio a wordo duna pa esnan abordo di Johanna Johnson y tambe pa un dokter cu tabata riba Cooks.
Tur e personanan cu tabata riba e boto di rescate a wordo pasa abordo di e barco Antonia Johnson. Antonia Johnson tabata bayendo Rotterdam. E tragedia aki a pone cu e barco Antonia Johnson mester a desvia di su ruta pa hiba tur e personan cu tabata abordo di Barao de Maua pa Aruba. Mientrastanto e barco Cooks a keda te den oranan di merdia pa atardi buscando e miembro di tripulante perdi, pero sin resultado.


E barco di carga Antonia Johnson di Suecia 
den waf di Oranjestad

Oranjestad: Diamars den careda di 4’or y mey di atardi, e barco di carga di e linea Johnson “Antonia Johnson” a drenta waf di Aruba, cu enberdad 2 curpa sin bida y 26 persona rescata di cual algun tabata levemente herida.


E tripulante di Barao de Maua, para riba Antonia Johnson, 
wardando pa baha

Aruba a wordo informa cu e barco Antonia Johnson ta yegando Aruba cu e victimanan 
Aruba a wordo informa cu e barco di carga brasilero ” Barao de Maua tabata 159 miya Noordwest di Corsou y cu ta despues di dos explosion fuerte e la pega candela. E capitan di Barao de Maua Sr. Jorge Eda Soares tambe tabata entre e personanan rescata cu a yega Aruba abordo di Antonia Johnson.


E capitan e di dos persona cu ta bahando trapi

Seis persona mas a keda raporta como perdi, pero e 6 personanan aki tabata e seis curpanan cu a keda atras riba e barco cu no por a sacanan na tempo, pa motibo cu e barco tabata na candela.


Centenares di hende riba waf pa spera
 e yegada di e barco Antonia Johnson

Aruba tabata bon prepara, wardando riba e yegada di e Antonia Johnson
For di oranan trempan di atardi por a mira centenares di hende na waf pa tabata testigo di e yegada di e barco Antonia Johnson. Un rato prome cu e Antonia Johnson a drenta nos waf, un tugboat a sali for di waf, abordo tabata tin dos dokter, Dr. Hazenberg y Dr. Chan. Di polis di Aruba tabata tin abordo W.R. van den Berg y Pedro Krozendijk, tambe sr. Albert Raven kende tabata director di Eman Handelmaatschappij, como e agencia cu ta representa e barco.

Riba waf por a mira 4 ambulance para, shersh y tambe Rode Kruis, cu tabata bou comando di Dokter Zijderveld. Alto inspector Bakker y Sr. Jean Marie Hoen di consulado tambe tabata presente riba waf. Pa motibo di e prome mensahenan cu a drenta cu tin dos morto y 4 persona gravemente herida abordo. Aruba a percura pa tabata bon prepara pa ricibi e victimanan na waf.


Bahando e dos cahanan di morto for di e barco

Manera cu e barco a mara den Waf di Paardenbaai, e shersh di Zepp Wever a busca e curpanan y a hibanan mortuario. E heridonan tabata tin varios kemadura, un di nan, su situacion tabata critico, e tabata completamente lora den verband, su kaak tabata kibra. No tabata facil pa carga e brancard pa bah’e for di e barco, pero cu cautela personal di ambulance a logra esaki.


Un miembro di tripulante cu a keda seriamente herida
 riba brancard pa wordo hiba den ambulance

Dos di e personanan herida a baha e trapie di e barco riba nan mes, pero cu ayudo di dokter Hazenberg y Dokter Chan. Tur e personanan herida a wordo transporta cu ambulance pa Hospital. San Pedro Hospital tabata tin tur cos cla pa ricibinan y asina brindanan e tratamento medico cu nan tabata tin mester di dje.


Algun herido bahando for di e barco Antonia Johnson

Bou di e 22 nan rescata tabata tin algun persona cu a keda levemente herida y nan por a baha riba nan propio forsa for di e barco, e 22 personanan aki a wordo hiba na Hotel Victoria den e tempo ey yama Nassaustraat y awendia yama Caya G.F. Betico Croes.
E barco Sueco Antonia Johnson despues di e baha e victimanan na Aruba, mesora a sigui su rumbo cu destino Rotterdam, Hulanda.

Representante di e compania y abogadonan representando e doñonan di e barco a yega Aruba
Dia 15 di maart, un dia despues di e tragedia, tur hende tabata keda papia di dje, e topico di dia tabata e tragedia di e Barco Brasilero. Riba e dia aki representante di e compania y abogadonan cu ta representa e doñonan di e barco a yega Aruba, pa asina haya sa mas di kiko tur a pasa cu e barco. E capitan di Barao de Maua, hunto cu Fernando Bisau, kende tabata e representante di e compania Brasilero cu ta representa e barco y tambe e abogadonan cu ta representa e doñonan di e barco,  Thomas Wheeler y su yiu James Wheeler a tene un conferencia pa splica mas di e tragedia cu a sosode dia 14 di Maart. Segun Sr. Bisau e compania di cual e barco ta pertenece na dje, ta e compania mas grandi den Latino America y ta conta cu un flota di 48 barco. E abogadonan nan abogacia ta na New Orleans y nan ta atende solamente casonan cu ta trata scheepvaart.  Sr. Fernando Bisau a splica  cu nan a bin Aruba pa motibo di e tragedia cu a sosode cu e barco di nan compania. E la splica cu e barco Barao de Maua a wordo construi na Brazil y e construcion di e barco a dura mas cu un aña, e la keda finalisa na 1964. E compania ta considera e barco aki, uno di un calidad di primera clase. Na 1971 e barco a bay dock pa reparacionnan.

E capitan di Barao de Maua a conta prensa kiko tur a pasa di ora cu e barco a sali y te ora e la pega candela
E capitan di Barao de Maua, Jorge Da Cruz Soares a conta prensa cu su persona hunto cu su tripulante a sali for di Buenos Aires, despues di a pasa algun waf na Brazil, nan a sali bay rumbo Puerto Rico. Dia 12 di maart 1972 e barco a sali for di Puerto Rico cu destino  Santa Martha, Colombia. Na salida for di Puerto Rico nan a wordo sorpresa pa un mal tempo, pero e mal tempo no a dura mucho. Diamars den oranan hopi trempan di mainta, nan a scucha un explosion chikito, cual a zona mescos cu ora un porta  dal cera. Despues nan a ripara cu tin un candela den e compartimento number 2. Mesora e tripulante a cuminsa combati e candela y nan a lanta e Capitan for di soño pa pone na altura di kiko ta pasando. Un rato despues den e compartimento number 3 tambe tabata tin candela. Na momento cu nan a pensa cu nan tabata tin e candelanan den compartimentonan bou control, a bin un di dos explosion cual tabata hopi mas fuerte y cu tur e consecuencianan fatal cu e la trece cu ne. Tur e personanan cu tabata combatiendo e candela entre e compartimentonan 2 y 3 a fayece.

E barco tabata tin un carga di explosivo abordo. Riba e pregunta cu si por ta trata di un sabotahe, segun e personanan presenta esaki no por tabata e caso. E causa exacto na e momentonan ey ainda no tabata conoci, e representantenan tabata wardando riba e resultado di e investigacionnan di e expertonan.

E Capitan a sigui splica cu na Puerto Rico nan a carga e compartimento number 3 cu maishi, mientras niun momento no a habri e compartimento number 2.
Durante e maltempo cerca di e costa di Puerto rico e bentananan di e compartimentonan tabata habri, esaki a wordo descubri na momento cu e tripulante a bay controla si e carganan a move door di e maltempo cu nan a caba di pasa aden.

Dos explosion a causa e candela
E candela den e barco a dura mas cu tres dia. Tambe e capitan a splica cu e prome rescate a yega mas o mentos mey ora despues di e explosion fuerte. Esaki tabata na momento cu e tripulante ya a subi den e boto di rescate. E capitan a subi e boto di rescate na momento cu no tabata tin niun persona bibo mas riba e barco cu tabata  completamente na candela. E la laga atras 6 curpa sin bida atras, cu nan no por a piki e momento ey, pa motibo cu tabata imposibel pa yega unda nan tabata ta, door di e candela feros. Tambe e la splica cu dos miembro di e tripulante a fayece. Aldizio Fabrizio da Silva a fayece den e boto di rescate y e otro tabata Jose Araujo Costa kenda a fayece abordo di Antonia Johnson. E dos curpanan aki Si a wordo treci Aruba. E miembro di tripulante Antonio de Souza tabata e persona perdi. E capitan a sigui conta cu na yegada na Aruba Jorge Da Silva y Geraldo Elias Dos Santos a wordo interna a San Pedro Hospital, ambos nan situacion tabata hopi critico, aparentemente Dos Santos tabata tin fractura na su craneo.

E sobrevivientenan cu tabata bon di salud a keda na Hotel Victoria y despues di dos dia a bandona Aruba
Dia 16 di maart e sobrvivientenan di Barao de Maua cu tabata bon di salud por a bandona Aruba, nan tabata hopi agradecido na Aruba pa e bon trato cu nan a ricibi di tur hende na Aruba, pero especialmente di e agencia Eman Trading, esaki sigur ta algo cu hamas nan lo por lubida.
Nan a tuma un buelo di ALM cu destino Caracas caminda nan lo a tuma un otro buelo cu destino Rio de Janeiro. Tres persona cu tabata herida a keda atras pa sigui nan tratamento medico y tambe e restonan mortal di e dos miembronan di tripulante cu a muri den e boto di rescate y abordo di Johanna Johnson a keda atras pa asina preparanan pa mandanan Brasil . E victima Dos Santos cu su situacion tabata hopi critico a conoce un poco mehoracion.

Un delegado Brasilero a yega Aruba pa tuma un desicion kiko ta bay haci cu e barco Barao de Maua
Diahuebs 16 di maart a yega Aruba, e secretario di e Ministerio di Asuntonan Externo di Brasil, Sr. Murio Cesar de Morales Pitao, e la wordo acompaña pa e Embahador Brasilero di Caracas Sr. Alcendo Cameiro Pouro. Ambos den compania di e consul di Brazil na Aruba, Dokter Eloy Arends Jr. a haci un bishita di cortesia cerca e waarnemend Gezaghebber di e tempo ey N.E. Henriquez. Nan bishita na Aruba tabata tin un solo meta, cu tabata pa cera e caso rond di e barco di carga, Barao De Maua.

Un respresentante di e compania di Navegacao LLoyd Brasilero, cual ta e compania cu na aña 1963 a traha e barco Barao de Maua a wordo pidi pa bin Aruba pa mira kiko lo por bay haci cu e barco aki, cu si acaso e por wordo drecha bekm of si lo mester sink esaki.

E barco a wordo busca y mara basta leu den lama dilanti Waf di Paardenbaai
Diabierna 17 di Maart, den oranan di merdia e tugboat “Poolzee” cu a sali pa bay busca Barao de Maua, Poolzee a tow e barco Barao De Maua y a trece te den awanan di Aruba. E barco a keda completamente destrui pa e candela y te hasta ainda huma tabata sali for di e barco.
Poolzee mester a mar’e basta leu den lama dilanti di Waf di Paardenbaai. Pa motibo cu gobierno no a dunanan permiso pa mara e barco den nos waf of na malmok, pasobra cu ainda tabata existi e peliger di mas explosion.


Sacando e dos curpanan cu a wordo haya riba e dek
di e boto

Despues cu e barco a wordo mara dilanti di waf, e tugboat Schelde a sali for di waf cu algun experto abordo, Sr. Colthof di e compania Smith-Tak, tambe havenmeester A.J. Van Velzen, nan a bay riba e barco pa mira e dañonan causa y tambe pa mira si nan por logra saca e curpanan cu tabata abordo di e barco. Riba e dek di e barco nan a bin topa cu restonan mortal di dos persona. Esakinan a wordo piki y Zepp Wever a transportanan pa mortuario. Caminda e restonan mortal di e otro 4 miembronan di tripulante tabata, tabata imposibel pa nan por a yega na esakinan, pa motibo cu ainda tabata tin candela den e parti aki.

Causa di e explosion sigui pa e candela feros ta conoci
E causa di e explosion y candela tabata pa motibo cu abordo nan tabata tin materialnan kimico cu lo a bin den contacto cu awa y esaki lo a causa e explosionnan y cu tur e consecuencianan fatal y desastroso.

Desicion a cay, no a keda nada otro cu pa sink e barco
E barco a keda por lo pronto basta leu den lama dilanti di Waf na Paardenbaai, esaki mientras tabata sperando riba un desicion,  cu kiko lo bay haci cu e barco aki. Durante weekend di 18 pa 19 di maart combersacionnan intenso a tuma lugar entre e representantenan di e barco Barao de Maua y e representantenan di e compania di Aseguro. Na final e barco a wordo declara total loss y a propone na e compania brasilero LLoyd pa sink e barco, e barco a keda pa dianan largo ta saca huma.

E barco a wordo gesink, den profundidad di Lama Caribe hunto cu e 4 curpanan cu a keda abordo
Diahuebs 23 di maart 1972, den oranan di merdia e barco Barao de Maua a wordo gesink leu for di costa nos costa den lama Caribe, hunto cu e 4 restonan mortal di e tripulantenan cu tabata imposibel pa por a sacanan for di e barco, e 4 curpanan a haya un seamen’s grave den fondo hopi hundo di lama Caribe.


Barao De Maua, barco brasilero, 
cu a kima riba lama 150 miya Noordwest di Corsou 
y a wordo gesink den Lama Caribe

E dos curpanan haya riba e dek di boto, no por a wordo identifica y a wordo dera na Aruba mes
Diamars 28 di maart 1972, dos di e 4 restonan mortal a wordo dera na santana Catolico di Oranjestad. Durante e entiero tabata presente E capitan di Barao de Maua y tambe Sr. Vrieswijk di Eman Handelmaatschappij kende nan a demostra nan ultimo respet na e fayecidonan.
E oracion di despedida a wordo resa pa Pastoor N. Erkamp. Tabata trata di e dos restonan mortal cu a wordo haya riba e dek di e barco na momento cu e tabata staciona dilanti di waf di Oranjestad. E dos curpanan aki mirando den e estado cu nan a keda tabata imposibel pa identificanan y pa e motibo aki a tuma e desicion di deranan na Aruba mes.

E otro dos restonan mortal cu si tabata conoci, a wordo manda Rio de Janeiro
E otro dos restonan mortal cu tabata di e personanan cu a muri den e boto di rescate y abordo di Antonia Johnson, a wordo manda door di Zepp Wever via Caracas pa Brazil, caminda nan entiero a tuma lugar den presencia di nan famianan y amigonan.

 

fuente: Amigoe, Naval History & Heritage y un persona anonimo