ORANJESTAD: Recientemente Banco di Caribe Aruba N.V. y su Personeelsvereniging (PV) a bishita Fundacion Pa Nos Comunidad (FPNC) pa haci entrega di productonan di prome necesidad di manera cu e fundacion por sigui sostene comunidad di Aruba.
E contribucion na FPNC ta cuadra cu e liña di maneho pa cu donacion di Banco di Caribe. Director di Banco di Caribe Aruba N.V. Sr. Elvin Maduro ta comenta cu e ta impresiona cu loke e organisacion a bin ta haci pa di un manera profesional haci e trabao social y brinda ayudo na esunnan mas vulnerabel den nos comunidad. FPNC ta coopera cu mas di 40 otro organisacion cu e mesun meta- esaki ta algo di aprecia!
FPNC a ser funda na 2009 y ta enfoca riba alivia hamber, brinda ayudo structural pa combati pobreza, crea manera pa hogarnan mas vulnerabel den nos comunidad participa y re-integra, colabora cu otro organisacionnan cu e mesun causa y brinda ayudo humanitario teniendo cuenta cu derechonan universal.
Riba foto adhunto por mira momento cu director di Banco di Caribe Aruba N.V. Sr. Elvin Maduro, Sra. Janien Bernabela comisario di PV conhuntamente cu e presidente di PV di Banco di Caribe Sr. Victor Wouters ta haci entrega di e comestibelnan na e directora di Fundacion pa nos Comunidad Sra. Gianaika v/d Biezen.
