Awe 17 di mei ta dia internacional di telefon pa ayudo di mucha y hoben. Ariba e dia aki Telefon pa Hubentud Aruba ta para keto y celebra hunto cu nos partnernan Internacional e importancia pa un pais tin un telefon pa ayudo di mucha y hoben. E aña aki mas cu nunca e importancia di ayudo via telefon y via internet na nos muchanan y hobenan tur rond di mundo y tambe na Aruba a ser demostra. Durante e pandemia di Covid-19 miyones di mucha, hoben y adolecente a ser yuda door di un di e 173 telefon pa ayudo di mucha rond di mundo. Tur parti di mundo, incuyendo Telefon pa Hubentud Aruba a keda brinda informacion, proteccion, ayudo y sosten durante e pandemia di Covid-19.
Fundacion Telefon pa Hubentud Aruba kier a haci uso di e momento aki pa yama Danki. Danki na tur nos mucha, hoben y adolescentenan cu den tur nan inquietud y problema a confia Telefon pa Hubentud pa duna nan informacion y ayudo. Danki ta bai na tur mentor di Fundacion Telefon pa Hubentud Aruba cu a y ta scucha y guia na nos muchanan y hobennan durante e pandemia aki y tur otro momento. Un danki special na nos consejo di hoben pa comparti cu nos nan pensamento y nan contribucion den e momentonan aki. Danki tambe ta bai na nos partnernan y coleganan di e veld social pa hacie posibel cu nos por a dirigi algun mucha/ hoben serka boso pa ayudo. Danki na tur nos frontlinernan pa para cla pa duna nos ciudadanonan cuido y proteccion. Danki na tur docente cu a keda brinda nos muchanan y hobennan educacion for di cas. Danki na e Covid-19 Crisisteam pa permiti Fundacion Telefon pa Hubentud Aruba sigui opera. Danki Aruba completo pa evita cu e virus a sigui plama.
E pandemia di Covid-19 tawata tin y keto bai tin impacto ariba e bida di nos tur. Sin lubida nos muchanan y hobenan cu diripiente tin hopi pregunta tocante na scol, deporte, amigonan, relacion cu nan mayornan, salud mental, stress, ansha, soledad, isolacion, nan siguridad y nan future. Nos muchanan y hobenan sigur tawata y lo sigui ta e grupo mas vulnerabel pa e impactonan secundario di e pandemia di Covid-19.
Asta durante e pandemia aki Fundacion Telefon pa Hubentud Aruba tawata tey pa scucha nos muchanan y nos hobenan. Ningun dia e servicio na nos muchanan y hobenan a stop. Nos a y ta scuchando e preocupacionan di nos muchanan y hobenan.
Un biaha mas, y e biaha aki durante un pandemia a ser demostra e importancia di un telefon pa ayudo di mucha.