ORANJESTAD – Oficina di Turismo di Aruba (A.T.A.) conhuntamente cu Aruba Excellence Foundation (A.E.F.) a uni pa asina brinda e programa di certificacion conoci como Aruba Certification Program (A.C.P.) pa prome biaha den un forma digital gratuitamente pa un tempo limita.
E reaccion pa cu A.C.P. online
Despues di a anuncia cu e programa di certificacion conoci como A.C.P. lo wordo brinda online gratuitamente, A.E.F. a ricibi un cantidad grandi di mas cu 900 persona cu a registra pa asina nan tambe bira ‘Aruba Certified’. A.E.F. ta hopi contento cu e reaccion ricibi y ta encurasha esunnan cu ainda no a logra registra pa haci uzo di e oportunidad unico aki.
Kico ta A.C.P.?
E programa di certificacion conoci como A.C.P. ta un programa cu a wordo lansa cu e obhetivo pa brinda informacion corecto y consistente tocante Aruba, e producto turistico cu ta wordo ofreci na Aruba, y pa mehora henter e experiencia brinda na e bishitantenen di nos isla. Ademas, e programa di certificacion A.C.P. tin como obhetivo tambe pa rebiba e sintimento di orguyo y union den e comunidad Arubano. Esaki ta wordo haci door di trece conocemento y educa e comunidad Arubano riba e identidad di e producto cu ta yama Aruba, e promesa haci na e producto aki, y e servicio excelente cu ta wordo brinda cu ‘zjeito’ na Aruba.
E programa ta consisti di 5 sesion den cual participantenan ta ricibi informacion corecto y consistente cu ta trata temanan manera entre otro historia di Aruba y di e industria turistico riba nos isla, nos tradicionnan, nos cultura, nos flora y fauna, geologia, y sin laga afo e parti di servicio excelente cu Aruba ta conoci p’e. E sesionnan lo wordo duna den Papiamento y participantenan por scohe entre dos orario cual ta 9:30 di mainta of 2:30 di atardi. Esencialmente, A.C.P. ta un di e programanan ofreci pa A.E.F. cu e meta principal pa mas hopi persona posibel cu ta labora den e sector di servicio y hospitalidad por certifica nan mes y di e forma aki yuda garantisa y mantene e nivel di servicio halto cu Aruba ya caba ta conoci p’e.
Pa registra por bishita e website http://www.acp.aw/en/register/