Home » Historia di Aruba: Asesino sentencia cu 2 aña di castigo di prison, pensamento primitivo lo a hunga rol den e sentencia

Historia di Aruba: Asesino sentencia cu 2 aña di castigo di prison, pensamento primitivo lo a hunga rol den e sentencia

by Admin
0 comment 150 views

Homber a cuchi’a su señora 5 biaha bandi su curason y e señora a fayece. 

Den historia di Aruba, mas o menos un 40 pa 50 aña pasa, sentencianan den corte tabata hopi straño;
Homber cu a maltrata su señora cu cuchiu y danki na bon trabou di e mediconan su señora a keda na bida. E homber a wordo sentencia cu 6 luna so den Capriles Kliniek.
Un otro caso den cual un homber conoci pa polis, cu un record riba su strafblad, a tira un baby recien naci den lama y e criatura a fayece, e homber aki a haya 1 aña di castigo di prison, kitando e tempo cu e tabata deteni caba.
Si compara e castigonan di tempo ey, cu e castigonan actual, sigur e castigonan a bira mas pisa.

E biaha aki nos lo dedica historia di Aruba, na un sucedido, un caso hopi lamentabel y tristo, den cual un homber, un buen creyente a enamora y a casa cu un prostituta, kende no a laga su mala maña y a sigui cu e ofishi mas bieu di mundo, tras di lomba di su casa.


Tur cos a cuminsa den añanan 1977/1978. Nos no lo divulga nomber, pero lo uza nomber ficticio, tampoco nos lo menciona e fecha di e sucedido, esaki  ta pa no haci e famia dolor.

Un cabayero di 39 aña, nos lo yame Buchi (nomber ficticio), un hende keto, cu sa bay haci su bishitanan leu a leu den bar. Buchi tabata un buen creyente, e tabata kere cu niun hende ta gaña. Buchi tabata buscando un amor real, un señora pa atende su hombro, un tiki a lo macho di e temponan ey. Mihor bisa un homber cu un pensamento hopi primitivo.

Luisa (nomber ficticio) un dama alegre, di 30 aña cu a nace na e pais di Merengue, Republica Dominicana. Luisa na un edad  hoben a drenta den e mundo di prostitucion, pa asina yuda cria su famia.

Den e mundo aki Luisa a haya un coneccion y sigur un gran oportunidad den su bida, pa bin traha na Aruba como un prostituta den un bar. E la despedi di su famia na Santo Domingo, sin sa kiko destino tabata tin prepara p’e.

E tempo ey tabata tin hopi dama procedente di Colombia y Republica Dominicana tabata bin Aruba pa haci diferente trabou, entre otro, den hotel, restaurant, na cas di como live in maid, pero tambe como animeermeisjes (prostituta).

E tempo glorioso di LAGO y turismo creciente, tankeronan tabata mara na waf di LAGO, e marineronan tabata bishita e barnan den San Nicolas y tabata paga pa poco amor.  San Nicolas tabata tin e tempo ey hopi bida, tienda, hopi auto, movecion den dia y den oranan di anochi. Barnan tabata habri den dia y anochi, bon equipa cu animeermeisjesnan pa duna tur nan clientenan e servicio desea.

Varios prostituta di e tempo ey a logra casa cu algun homber stranhero, pero tambe cu hombernan local. Tur e muhenan aki cu a casa cu hombernan local tabata haya automaticamente nacionalidad Hulandes y naturalmente  paspoort Hulandes. Esaki bo por bisa tabata manera un premio y un porta cu ta habri pa nan bay Europa.

Luisa cu ni a cumpli 30 aña ainda a yega Aruba y a bay traha como prostituta den un di e barnan na San Nicolas. Un dama hoben cu yen soño pa futuro, soñonan cu nunca lo bay wordo cumpli.

Buchi di mas o menos 40 aña tabata bay bishita e barnan den San Nicolas y un dia su wowonan a cay riba un di e damanan den e bar, e dama aki tabata Luisa.

Durante un di e bishitanan Buchi a cera amistad cu Maria (nomber ficticio) y den puro confiansa, e la admiti cu e ta gusta Luisa. Un luz a cende den cabes di Maria, kende ta un persona cu hopi lihe ta traha plan y ta bin cu ideanan. Maria tabata amiga of colega di Luisa, e la acerca Luisa cu un idea, un plan cu segun Maria lo ta hopi bon pa futuro di Luisa. Nan a bay di acuerdo y Maria a bay presenta e plan aki na Buchi.

Un dia sinta den bar Maria a acerca su amigo Buchi bisando e cu si e kier casa cu Luisa y tambe cu Luisa lo pag’e mil florin pa casa cu ne. Pues un matrimonio fingi caminda ta djis casa pa haya nacionalidad Hulandes y pa asina Luisa no lo mester bandona Aruba mas, manera ta poni den su permiso. Buchi cu di berdad tabata enamora di Luisa, no a bay di acuerdo pa un casamento fingi.

Tempo a pasa y Buchi a keda enamora di Luisa. Un dia Maria a bolbe acerca Buchi, pero e biaha aki cu un otro propuesta. Maria a puntra Buchi si e kier casa cu Luisa, pero e biaha aki SI ta pa supuestamente “Amor” Luisa lo casa cu ne, lo stime’le y biba cu ne den cas como “marido y esposa”. Maria cu sa cu Buchi tabata tin un matrimonio cu a fracasa tras di lomba, a sigui bis’e cu esaki ta su chens di cuminsa un bida matrimonial nobo.

E biaha aki Buchi como un buen creyente a bay di acuerdo. E pareha a casa y enberdad a bay biba den cas hunto, tur cos tabata mustra di tabata bayendo bon. Buchi tabata traha y su señora Luisa tabata supuestamente traha den un restaurant.

Tur cos tabata mustra real, pero en realidad e tabata un mentira grandi,  paso Luisa niun dia a stop di prostitui. Pues, tabata gaña su casa cu e ta trahando den un restaurant.

Luisa a lubida un cos, cu Aruba ta un pueblo chikito y otro cos cu Buchi ta hende di San Nicolas. Na Aruba e tempo ey sin celular, sin internet, redo tabata core masha lihe mes y tabata yega na orea di tur hende.

Un dia Buchi a bin tende cu su kerida casa Luisa tabata gañando su persona cu e ta trahando den un restaurant, pero en realidad Luisa tabata drumiendo cu homber pa placa.

Buchi normalmente ta un persona hopi trankilo, pero e biaha aki su fuse a bula. Despues cu e la dal un bon bebi y tabata bou influencia di alcohol. E no por a controla su emocionan mas, e la bay enfrenta Luisa cu e berdad. Na un adres den Helfrichstraat, esaki a sosode.

Durante e discusion Buchi a termina na hinka Luisa 4 pa 5 biaha cu un cuchiu den su pecho, den area di su curason. Un di e hinkanan tabata net na su curason y cu consecuencia cu Luisa a muri mesora.

Despues cu e la bin realisa cu e la asesina su casa, Buchi a spanta y a core sali for di e cas. Esaki tabata den oranan di marduga. Net na e momento ey cu dos recherche tabata patruyando den Helfrichstraat y nan a mira enberdad un homber bisti na preto core sali na careda for di e cas. Mesora nan a dicidi di sigui’e pero den e hanchinan, e recherchenan a perde for di bista.

E recherchenan a bay na e adres den Helfrichstraat pa mira si tur cos tabata ok, pero net na momento cu nan a yega na e cas, ya na warda di San Nicolas a yega un señora di 43 aña di nacionalidad Dominicano, bisando cu den e cas den Helfrichstraat tin un persona cu a wordo hinka cu cuchiu.

Tanto polis y e dama (43) a bin topa den e cas cu Luisa sin bida, drumi den un plas di sanger. Mesora e recherchenan a cuminsa cu un investigacion kende ta e tipo cu nan a mira un rato prome bisti na preto sali na careda for di e cas.

Hopi lihe nan a bin haya sa cu tabata Buchi y mesora e la wordo deteni como sospechoso di e acto aki. Na prome instante Buchi a nenga, pero mirando tanto prueba contra su persona, no a keda nada otro di admiti cu e la mata su casa.

E la wordo cera y un prestigioso abogado di e tempo ey a representa Buchi den corte. E defensa a bay mas den e direccion cu Buchi tin un pensamento primitivo, tambe cu e casa y su amiga a abusa di su ignorancia. E abogado a menciona den su defensa cu Buchi no tabata tin un bida facil, cu e la pasa den hopi problema.

Di otro banda a traha varios raport, cu a wordo presenta den corte. E raport di psikiatra tabata mustra cu Buchi ta un persona peligroso pa comunidad ya cu e por bolbe ripiti e crimen aki.

E raport di psikologo en cambio tabata mustra cu e tabata tin un bida dificil y cu civilisacion no ta yega pa e por a compronde kiko tabata pasando en realidad.

E raport di reclassering tambe tabata na banda di Buchi y mustrando cu si e wordo bon guia e por drenta comunidad bek sin cu mester teme cu e lo bolbe comete e crimen.

Corte den prome instancia a sentencia Buchi cu solamente 2 aña di castigo di prison, mientras cu fiscal a exigi 4 aña di castigo.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio