Dialuna atardi a tuma nota cu prostitucion ta sigui den hanchi di San Nicolas. Mientras cu e barnan ta cera pa motibo di ‘Shelter in Place’, den e hanchi patras di e barnan tin algun dama siguiendo cu nan trabou. E damanan aki ta sinta patras y ta ofreciendo nan servicionan na cliente. Esaki sigur ta algo cu lo sorprende hopi hende mirando e ordo cu tin, cual ta poniendo hopi enfasis pa hendenan tene distancia di otro (social distancing).
Via canal oficial nos a bin compronde cu algun tempo atras trabounan di prostitucion a wordo para pa e temporada aki. Tambe nos a wordo informa cu e damanan a regresa nan pais di residencia. Pues no ta compronde con bin cu e personanan aki ainda ta na Aruba, y cu nan trahando.
Ta berdad cu hendenan tin nan necesidad financiero y kizas e responsabilidad familiar pa provee financieramente pa nan. Pero ta hay’e un acto sumamente iresponsabel di parti cualkier sorto di negoshi no esencial, pa sigui cu nan trabounan durante un pandemia global.
Den e negoshi di prostitucion, e damanan aki no ta mustra di por ta opera independientemente. Nan ta trahadornan cu tin doñonan di trabou cu nan mester responde na dje. Awor e ta increiblemente iresponsabel di parti e ‘doñonan di trabou’ pa permiti ‘business as usual’.
Tambe e ta iresponsabel pa crea situacionan unda ta posibel pa ambos e prostituta (bo mesun trahador) y e cliente pa keda contagia cu COVID-19. E situacion ta uno hopi serio. COVID-19 ta un infeccion respiratorio cu por ta mortal.
COVID-19 ta un virus cu por ta contagioso hasta sin cu un persona ta mustra sintoma. Pues si un di e damanan aki wordo contagia, e por sigui plama e virus na su clientenan cu despues ta bay cas y ta pega nan miembronan di famia. Enberdad cu e casonan activo registra na Aruba ta keda baha, pero esaki no kermen cu mester neglisha e medidanan poni pa seguridad di salud publico.
Un pregunta cardinal ta keda, con bin cu autoridad no a cay riba esaki ainda? E por ta door cu nan ta patruya den auto di polis y e damanan aki ta pendiente pa asina sconde. Durante Toque de Queda si ta sali den auto particular, pa mira cua cuidadano ta pafor di nan cas pa asina detene nan. Con bin durante Shelter in Place ainda no a uza auto particular pa controla e hanchinan di San Nicolas?
