Home International Pentagon ta publica 3 video mustrando nan encuentro cu UFO

Pentagon ta publica 3 video mustrando nan encuentro cu UFO

SHARE

E oficina central encarga cu defensa militar Mericano, Pentagon, a publica 3 video unda a spot UFO. Pa esnan no familiar cu e terminologia, UFO ta un afkorting pa “unidentified flying object.”

Aki ta ser papia di un obheto aereo ireconocibel. Un obheto cu su apariencia y modo di operacion ta babuca esnan cu encontre. Sigur un misterio cu a pone algun persona specula riba existencia di extraterrestre.

Aki por mira e video footage cu nan a haci publico.

Den un declaracion duna pa e Pentagon nan a splica cu despues di un investigacion profundo a determina cu e videonan aki no ta revela ningun informacion sensitivo. Pues publicando e imagenan no ta riesga revelacion di informacion sensitivo riba sistemanan y capacidadnan militar.

Tampoco e videonan ta stroba cualkier investigacion militar. Pues Pentagon a dicidi di haci e videonan accesibel pa e publico. Di e 3 incidentenan e prome a ocuri November di aña 2004 y e otronan Januari di aña 2015.

E vocero di Pentagon a reconoce cu den pasado e videonan aki a leak caba pa e publico. Awor ta haci e videonan oficialmente disponibel pa e publico pa confirma cu e videonan circulando ya algun añas ta legitimo.

E video di e incidente na aña 2004 a wordo publica caba pa New York Times riba 16 di December aña 2017. Aki New York Times a logra entrevistra tambe e dos pilotonan envolvi.

E pilotonan a describi e obheto como uno plat y largo cu tawata 40 pia di largura. E obheto tawata bulando 50 pia riba lama. Momento cu nan a aserca e obheto, e a rapidamente ascende den aire y nan a perd’e for di bista, un di e pilotonan a bisa.

E publicacionan di Merca su Pentagon a habri espacio pa hopi mas pregunta y curiosidad riba e datosnan cu ainda ta confidencial pa publico.