Home International Lockdown a causa victimanan di violencia domestico pa pidi auxilio na nan...

Lockdown a causa victimanan di violencia domestico pa pidi auxilio na nan botica

SHARE

Francia – Diadomingo pasa un señora a cana drenta un botica, esaki ta un dje poco lugarnan ainda habri despues cu un lockdown nacional a wordo introduci. E dama no tawata eynan pa medicina, e a presenta eynan pa informa e apotheker cu su pareha tawata abusando di dje.

Unrato despues e señora su casa ta wordo deteni pa agentenan policial Frances. E pandemia di coronavirus a causa cu personanan vulnerabel a haya nan mes sera den cas cu nan abusador. E lucha contra e pandemia a pone cu ciudadanonan a haya nan bou di un lockdown.

Victimanan di violencia domestico ta awor sera den cas cu nan abusador. Expertonan ta bisa cu victimanan no por yama polis o tin miedo di yama polis. E tecnica cu e señora na inicio di e articulo aki a uza ta uno cu a wordo inspira for di Spaña.

Na Spaña victimanan di abuso domestico ta wordo bisa pa bay botica. Esnan cu no por papia abierto cu nan apotheker pa un o otro motibo, por uza un codigo pa raporta e situacion. E palabra codigo ta ‘mask 19’.

Mientras cu gobiernonan ta keda introduci medidanan mas y mas estricto, fundacionan y cuerponan policial ta bati alarma riba e posibel aumento di violencia domestico. Sera den cas cu un abusador ta haci un persona mas vulnerabel. E persona no tin manera pa scapa.

Tambe diferente estudio a prueba cu situacionan cu ta emocionalmente tenso o di hopi stress ta aumenta actitud agresivo den hogar. Aumento di violencia den hogar por sosode durante diferente ocasion. Crisis economico, desaster natural o hasta wega internacional di futbol por causa violencia.

Mester remarca si cu esaki no ta un excuse pa un persona comete abuso o violencia den hogar. Esaki ta solamente pa ilustra situacion cu por escala violencia, y no pa kita responsabilidad personal di e abusador.

Semper tawata existi violencia di genero, pero crisis ta empeora esaki. Un Minister Frances, Christophe Castaner, a laga sa cu casonan di violencia domestico a aumenta cu 36%. Polis a haya nan ta interveni hopi mas den e ultimo tempo despues cu e lockdown a wordo introduci.

Gobierno di Francia a anuncia cu nan lo paga pa 20000 anochi den camber di hotel pa victimanan di abuso domestico. Tambe den supermercadonan a postula profesional cu por provee posibel victimanan informacion y ayudo.

E aumento di violencia domestico ta uno mundial. E virus ta rekeri hopi atencion y energia for di gobiernonan y autoridadnan. E miedo cu diferente institucion encarga cu atende victimanan di violencia ta cu e proteccion legal cu mester tin lo faya.

Den un situacion normal mes e por ta dificil pa victimanan pidi ayudo o haci yamada di emergencia. Pues e lockdown ta hacie hopi mas complica.Pesey Reino Uni a introduci un ‘chat box’. Aki personanan cu mester ayudo por incognitamente pidi asistencia policial.

Mester nota cu victimanan di violencia domestico no ta consisti solamente di un persona (e pareha o casa), muchanan den e hogar tambe ta keda victima. Pa termina un relacion cu ta fisicamente y/o psicologicamente abusivo no ta facil. E pandemia a percura pa haci esaki mas complica ainda.

Si abo o un persona serca di bo ta experienciando e tipo di violencia aki por fabor busca ayudo. Por yama Fundacion pa Hende Muhe den Dificultad na 583 5400 o Polis na 100.