Home Uncategorized 50% di casonan di coronavirus no ta mustra sintoma, esaki segun expertonan...

50% di casonan di coronavirus no ta mustra sintoma, esaki segun expertonan medico di Islandia

SHARE

Islandia ta haciendo test riba un cantidad grandi di nan ciudadanonan pa determina cuanto ta contagia cu COVID-19. E hecho aki ta yuda mundo medico compronde e virus nobo aki mas mihor. E pais ta haciendo testnan riba escala grandi y expertonan ta di opinion cu esaki ta esencial den controla e virus.

Islandia ta un isla di 360,000 persona. Desde diamars, e pais a haci test riba 17.900 persona. E cifra aki ta representa casi 5% di e populacion total. E pais ta lagando esnan cu ta mas na riesgo o cu ta mustra sintoma caba haci test na hospital.

Mientras cu tur otro persona ta bishita un compania biofarmaceutico pa haci e test.E compania priva yama, deCODE Genetics, ta haciendo esaki bou instruccion di e pais su hoofd epidimoloog. deCode a logra test 9000 persona pa e virus.

E resultado di e investigacion a duna indicacion cu e esfuerso haci pa gobierno pa limita e crecemento di e virus a resulta efectivo. Menos cu 1% di tur e testnan haci a sali positivo, pero 50% di esaki tawata asintomatico o e caso unda tawata tin sintoma hopi leve.

Esaki ta nifica cu un persona infecta cu e virus lo no tin ningun sintoma, o lo no tin ningun muestra obvio cu e por ta contagioso pa otro. Esaki ta confirma conclusion cu otro investigacionan a ya yega na dje. Pues cu e crecemento rapido di e virus ta pa motibo cu tin persona no ta mustra sintoma.

Esaki ta haci cu un persona lo no ta consciente cu nan por ta contagioso pa otro, y cu tur e consequencianan peligroso pa esnan mas vulnerabel den nan cercania. Mester nota cu esaki tawata un investigacion haci unda cu no tawata tin un metodo di seleccion. Hendenan a presenta riba nan mesun iniciativa.

Tambe e por ta e caso cu e test a gara casonan di e virus cu tawata mas den su fase inicio. E fundador di e compania, Dr. Kári Stefánsson, ta pidi pa tene cuenta cu e estudio haci tin cierto limitacionan.

Stefánsson a presenta un teoria tambe unda cu kizas tawata tin algun mutacion cu a sosode haciendo cu e virus ta manifesta den diferente forma. E por ta tambe cu un persona su genetica ta afecta su condicion.

Oficialnan di e pais no a tuma medida manera lockdown of un curfew. Nan a cancela si tur evento unda mas cu 100 persona lo ta presente. Tin reglanan estricto tambe di cuarentena pa esnan contagia o cu a bin den contacto cu un persona positivo. Cu e informacion (data) cu nan tin riba e virus, nan ta hopi bon prepara pa track esaki.