COVID- 19, conoci como Corona Virus ta sigui crece na Hulanda.
Amsterdam, Hulanda: Diadomingo dos persona mas cu tabata infecta cu e Corona Virus a fayece, ta trata di dos homber, un di 86 aña cu tabata interna na Bernhoven Ziekenhuis na Uden, cu ta keda na Noord Brabant. E otro ta un homber di 82 aña di Sittard-Geleen, e tabata interna na Zuyderland Medisch Centrum.
Ambos persona tabata hopi malo caba, esaki RIVM a anuncia diadomingo merdia. Actualmente tin un investigacion andando con e dos hombernan aki por a keda infecta cu e virus aki.
Te na e momentonan aki na Hulanda tin tres persona caba cu a fayece di e virus aki. E prome persona cu a fayece tabata algun dia pasa, tabata trata di un homber di 86 aña kende tabata interna na Ikazia Ziekenhuis na Rotterdam.
For di diasabra pa diadomingo, na Hulanda 77 persona mas a keda infecta cu Corona Virus. Di e personanan infecta 144 a haya e virus despues cu nan a bin for di exterior, di esaki 131 persona infecta cu e virus tabata recientemente na e parti Nort di Italia. Otro 74 persona a wordo infecta na Hulanda mes, pa un otro persona cu ya caba ta infecta. Tambe 46 persona cu ta infecta, no ta conoci con nan a haya e virus aki, actualmente tin un investigacion andando pa haya sa con e 46 persona nan aki lo por a keda infecta cu e Corona Virus.
Salubridad Hulandes tin tur atencion pa e virus aki y su desaroyonan ta wordo sigui di cerca y constantemente RIVM ta publica cualkier desaroyo nobo riba medionan social y den prensa Hulandes. Na Hulanda mas cu 6 mil test a wordo haci caba y na tur laboratorio rond Hulanda e por wordo haci. Tambe Gobierno Hulandes ta dunando tur tips y informacion con pa preveni y kiko pa haci referente e Corona virus.
Fuente: RIVM (Rijksinstituut voor Volksgezondheid en Milieu)