Aeropuerto Internacional Reina Beatrix: Diasabra den careda di 3’or di atardi, a keda raporta un menasa di bom, esaki tabata den e parti di Imigracion Mericano (US CBP). Mesora a bati alarma y a cuminsa cu e proceso normal pa atende cu esaki.
Pa 4’or y mey di atardi Airport di Aruba a manda un comunicado oficial, confirmando e menasa di bom cu a wordo raporta den careda di 3’or di atardi, den e area di Imigracion Mericano (US CBP). Esaki sigur ta algo cu ta wordo tuma hopi na serio y cu tin un procedura pa atende cune. Pa e motibo aki mesora Airport di Aruba a para tur operacion. Un persona a keda deteni y su handbag a keda sigura. Bomb Squad a busca den e handbag y despues a confirma cu no tin niun menasa di bom. E pasahero lo a haci un mal “Joke”, cu a cost’e su libertad.
Pa 4’or y 10 Airport di Aruba a cuminsa back cu su operacionnan. E yegadanan di avion si a sigui durante e situacion fastioso aki pero pa 4’or y 24 e buelonan di KLM y di TUI a wordo desvia pa Corsou, pa motibo cu no tabata tin mas espacio pa e avionnan aki staciona na Aruba su Airport, no ta descarta e posibilidad cu mas avion lo wordo desvia pa e motibo aki.
UPDATE: E buelonan di KLM y TUI e desviacionnan a wordo cancela y nan lo yega Aruba manera tabata stipula anteriormente.