Santa Cruz: Diadomingo algo pasa di 2’or di marduga, un dama tras di stuur di un Chevrolet Aveo, bayendo direccion di e rotonde Santa Cruz, un poco pabou di e rotonde a perde control y a dal contra un palo di luz. E impacto tabata fuerte cu esaki a pone e wayanan di coriente spart candela, mesora a avisa polis.
Na yegada enberdad polisnan a topa cu e dama chauffeur, e dama tabata mustra poco bou influencia, mesora nan a lage supla y e dama chauffeur a supla un tiki dimas, pero mirando e daño material na e auto y na e palo di lus , e polisnan a dicidi di pidi pa presencia di ambulance, pa haci un checkeo medico cu e dama chauffeur.
Despues cu e paramediconan a controla e dama, polis a hiba e dama pa warda di polis.
Polis a pidi pa presencia di ELMAR na e sitio, pa atende cu e wayanan cu a cay y tabata spart candela, esaki a causa cu algun cas den e becindario a keda sin coriente.