Druif Beach: Diahuebs den careda di 3’or y mey di marduga presencia di polis a wordo pidi na un Low Rise Hotel, pa un turista cu a bebe di mas y a pasa tur limite di fastioso, mesora a manda un patruya na e hotel.
Na yegada nan a bin compronde cu un turista homber kende algun ora prome a yega nos isla pa pasa vacacion, a bay dal algun drinks na e bar di e hotel. E turista no por a controla e alcohol y tambe cansancio di vuelo a hunga un rol, cu e efecto di alcohol a pone bira hopi fastioso.
Tur cos a cuminsa na momento cu un turista muhe kende tambe tabata tin poco drinks den curpa, a cuminsa acusa e homber cu ela mishi cu su tas y cu supuestamente e homber lo a coi 200 dollar for di su cartera. E homber a bisa cu no ta asina, cu kisas den su estado di buracheria por a mishi cu e tas, pero sigur tabata cu niun mal intencion.
Polis a trata di saca mas informacion di e supuesto ladronicia aki, pero e dama turista cu na prome instante a acusa e homber a nenga di bay atende cu polis. Mirando cu e dama no tabata kier a entrega un keho oficial, cu e homber lo a horta su 200 dollar, polis a dicidi di bandona e sitio.
Despues di un rato e security di e hotel a dicidi hiba e homber na su camber, na momento cu ela bay baha for di e shuttle, ela dicidi di saca e yabi di e shuttle y cana bay cu ne den su man na su camber. Mesora e trahadonan di hotel a bolbe pidi pa presencia di polis pa intermedia cu e hotelguest aki, cu no ta solamente burachi, pero hopi fastioso tambe. Prome cu polis a yega bek, e homber a disaparece for di nan bista, e no tabata ni den su camber tampoco. Polis a dicidi di cuminsa buske cu un flashlight banda di lama.
Polis a logra topa cu e homber aki, e biaha aki si nan a detene y a transporte cu transportwagen pa Warda di Polis, caminda elo mester bay duna cuenta di su mal comportacion.