Fundacion Autismo Aruba ta desea docente y alumno un aña escolar exitoso

Docentenan ta para dilanti un otro aña yen di reto y sigur cu e realidad cu mas y mas mester educa alumnonan cu tur ta diferente. Sigur si algun ta cay den e Spectrum di Trastorno di Autismo (Autism Spectrum Disorder), ASD.
Esaki ta motibo tambe pa kico dos representante di Fundacion Autismo Aruba, FAA, a atende un ‘intensive summer course’ riba e tema di educacion inclusivo, brinda door di University of Central Florida, UCF. Tur esaki cu e meta di bolbe Aruba cu informacion y conocemento balioso pa asina por cuminsa cu e projecto di Klasnan Inclusivo na Aruba.
Durante e curso aki nos miembronan, Carolina Span y Joanna Croes a haya diferente les for di diferente professional incluyendo Profesornan di UCF riba e topico di psycologia y educacion, specialistanan ariba e tereno di educacion, terapia ocupacional, estadistica y educacion special.

Etopiconan discuti den e curso tabata entre otro: klasnan inclusivo y su beneficionan, diseño universal di klasnan, tecnologia den klasnan, apoyo pa studiante y maestro, proceso sensorial, disturbio emocional, experiencianan infantil traumatico of negativo, abilidadnan di autodeterminacion, teorianan di comportacion y siñamento, diferencia den studiantenan, interaccion positivo, strategianan pa enseñansa inclusivo, con pa uza data den educacion y hopi mas.
Den un sistema di educacion inclusivo e scolnan ta reconoce cu tur studiante tin diferente necesidad pa asina por logra nan maximo potencial den e etapa escolar cu nan ta.
Alumnonan cu cierto trastorno, manera autismo, ADHD, dyslexia etc. ta siña den un ambiente cu ta brinda nan e espacio pa por sigi avansa sin ta perhudica. Tin hopi manera pa scolnan cuminsa nan proceso pa ta inclusivo door di entre otro ta conciente di con e lokalnan ta diseña y si di berdad e ta promoviendo educacion pa un y tur.

E sistema tambe ta enfoca hopi ariba e creatividad di con e lesnan ta duna pa asina tur studiante por compronde. Ora cu scolnan tin un curriculum, e importancia ta pa e studiantenan siña e curriculum, pero hopi biaha nos ta kere cu nos mester ta rigido den e forma cu ta brinda e curriculum aki. Educacion inclusivo ta demostra cu e importancia mester ta pa sigura cu tur studiante por compronde, siña y ta exitoso den e curriculum aki.
Meta di e curso aki tabata pa enfoca ariba e importancia di educacion inclusivo den tur etapa escolar. Educacion inclusivo ta un sistema cu ta existi pa hopi aña y a demostra cu e tin beneficionan pa studiantenan regular como studiantenan cu necesidad.
FAA e siman aki lo reuni pa determina e plannan concreto pa acerca algun scol, pa hunto traha riba un proyecto piloto, aplicando e conocemento cu a adkeri na e curso intensivo.
Cu esaki, FAA kier duna un contribucion na e participacion di alumnonan cu ASD den scolnan regular y tambe sostene e trabou dificil di maestronan.

Ta desea tur docente na Aruba y tur alumno y nan mayornan y cuidadonan, un aña escolar 2019-2020 exitoso, yena cu logronan y experiencia, y cu mente habri pa hunto alcansa metanan na bienestar di nos tur.

Fundacion Autismo Aruba a lanta na 2005 cu e meta pa sostene personanan cu Autismo y nan famia, pa medio di campaña di consientisacion, tayer pa mayor y docente, y actividad particularmente pa muchanan cu Autismo. E fundacion ta totalmente dependiente di donacion y ta constantemente en busca di miembronan pa fungi den directiva y como voluntario.

Pa mas informacion por tuma contacto cu FAA.
Email: [email protected].
Facebook: Fundacion Autismo Aruba.
Cuenta di Banco: rbc #7700000042769067