Falta di iluminacion na e caminda pazuid di Santana, bruhonan ta sigui tira nan cosnan den Santana.
Lo ta bon si nos compania local ELMAR N.V. pone un palo di lus cu un bon iluminacion, na e parti pabou, riba e caminda pazuid di Santana, pa asina mira si por caba of baha e tiramento di cosnan straño y fies (bruheria) den Santana di Paradera, esaki ta sosode semper den oranan laat di marduga.
Comission di Santana di Paradera ta haci un suplica na e persona of personanan(Bruhonan) cu tin cierto creyencia y ta pasa tira saco cu cosnan straño y hopi fies den Santana pa nan please stop.
Respeta e Santana y stop di causa molester na esnan cu ta bishita graf di nan sernan keri den Santana di Paradera.
Paradera: Comission di Santana a splicanos cu no ta prome biaha y cu ta cada pasa algun luna nan ta haya e cosnan aki benta den Santana.
Nan ta haya saconan cu caha di sapato mara cu cabuya den e cahanan aki tin bestia morto hinka, mayoria di bes gai, galiña, of paloma, tambe algo manera un bala di carni lora den un saco di plastic, paña di mucha, jockey di homber, paña preto lora cu algo cu ta hole hopi fies etc etc. Den pasado tambe nan a bin topa cu un graf tur na sanger y tabata hole hopi fies, no ta tur caminda tin conexion di awa den Santana y ta cu hemchi awa y cu disinfectante e personanan encarga cu e santana mes mester a haci limpi. Muy probablemente lo ta trata bruheria, creyencianan di esnan di otro pais.
Tur esaki tin e comision di santana hopi cansa, paso nan no ta mira un fin na e sushedad aki. Algun luna pasa tabata tin asina hopi cos benta den cura di Santana, cu tabata saca asina un holor desagradabel, cu nan mester a pidi un compania priva pa piki e sushedadnan aki, niun hende no por soporta y e compania tin un spray special cu ta kita e holo desagradabel aki, esaki a hacie mas facil pa nan por a pikinan. Biaha pasa e compania a dunanan un bon colaboracion, pero no por ta asina cu cada tanto tempo tin cu yama e compania, paso nan por yuda un biaha pero no constantemente, nan tambe lo bay cuminsa presenta un cuenta na e comision.