Oranjestad – Museo Arqueologico Aruba a acerca Departamento di Cultura Aruba, ambos bou auspicio di Ministerio di Cultura, Fundacion 1403, Fundacion Lanta Papiamento y Stichting Rancho pa haci e Caribbean Fair aki uno varia. Pa Departamento di Cultura Aruba esaki ta den su puntonan di prioridad di educacion den Arte y Cultura, ta apoya y sostene e evento aki. Fundacion Lanta Papiamento ta hopi contento y ta sostene e iniciativa aki cu e topico Papiamento. Lo tin panel cu informacion pa pueblo haya sa mas tocante historia di Papiamento. Con nos idioma a desaroya den curso di siglonan cu a pasa. Ademas lo tin wega di Papiamento na cual grandi y chikito por participa. Y den e sala di presentacion lo pasa diferente grabacion di entrevista tocante historia y situacion actual di Papiamento. Fundacion 1403 lo t’ey y ta sostene Museo Arqueologico. Nan tur como partner pa e evento aki. Y mas cu claro lo tin oportunidad pa por cumpra e buki nobo ‘The Archaeology of Aruba; The Pictographs and Petroglyphs’ durante e evento. Fundacion 1403 lo ta encarga cu benta di e buki. Reserva e fecha di 26 di juli pa e dushi evento di Caribbean Fair y bini cu henter famia na Museo Arqueologico na Schelpstraat 42, net patras di Kong Hing den Havenstraat.
Motibo pa realisa esaki:
Museo Arqueologico Aruba den colaboracion cu MUSEON Den Haag y Secar Research Center di St. Eustatia a planea un evento como parti di nan programa conhunto pa publico en conexion cu e exposicion ‘Caribbean Ties, Connected people, Then and Now‘ y diabierna dia 26 di juli Museo Arqueologico ta lansa su parti di “Caribbean Fair”. Bin pasa un momento dushi carga cu informacion educativo y interesante. Un rato den ambiente Caribeño entre 5 pa 10’or di anochi cu tayer creativo, presentacion interesante, dushi cuminda Caribeño y hopi mas!
Fo’i di 6:00 pm artista contemporaneo Osaira Muyale di Studio O lo presenta e historia tras di e ‘City Art’ di e cabaynan blou den Oranjestad y Paardenbaai. Sigui pa un presentacion pa arkeologo drs. Harold Kelly tocante e periodo Archaico, cu informacion nobo di nos historia Indjan di Aruba, cu a sali danki na e investigacion di NEXUS1492.
Entre 5:30 pa 7:30 pm artista conoci pa su obranan di klei, Trudy Lampe lo duna un tayer di e tecnica di ‘coil’ cu Indjannan di Aruba y den Caribe tambe a uza pa traha nan potchi. Otro artista local Gloria Feliciana lo duna un tayer di traha prenda cu glas di lama. Mustrando asina con ta recicla un material cu no ta pertenece den nos medio ambiente, pero cu Indjannan, tanto na Aruba como den Caribe a cuminsa incorpora den nan decoracionnan den e periodo historico. Esaki despues di e prome contacto cu Europeanonan. Artista cu tambe a uni sumes ta Maya Lepsanovic, kende lo duna un tayer di traha un ‘flamingo fridge magnet’ na unda e particpantenan lo decora un pida di (drift)wood cu pintura den colornan Caribense. Tur e workshopnan aki ta gratis.
Alabes lo tin dushi cuminda Caribense na benta, manera un bon BBQ, un invento di traha cuminda originalmente di Indjannan, pues e nomber mes ta bini di e palabra indigena ‘barbacoa’. Tambe ‘Taki’ lo tin dushi snacks traha di entre otro cadushi y juice di walishali. Lo tin stand di cuminda Surnam y Cubano. Bini y purba tambe un dushi cuminda of pasaboca di Dominica, St. Maarten y Trinidad. Stichting Rancho lo ta na encargo di e bar, di e forma aki recaudando fondo pa nan bon trabou den comunidad di e bario Rancho.
Museo Archeologico Aruba, Departamento di Cultura Aruba y cu sosten di Ministerio di Cultura ta contento den realisa e ‘Caribbean Fair’ aki. Cultura bo mester bib’e. Door di conoce nos pasado p’asina por traha riba un miho futuro. Mirando cu ta den vakantie nan ta spera cu mayornan y e hubentud di Aruba no perde e evento aki.