ORANJESTAD – Durante su mensahe e presidente nobo Compañero Leon Junior Arends a gradici Dios Tata Todopoderoso, su famia y e miembrecia di club pa e confiansa den su persona pa dirigi e organisacion pa e proximo periodo, como tambe a gradici e miembronan pa acepta e reto pa forma parti di e directiva nobo. E meta pa e aña nobo ta pa eleva e organisacion na un di 100% Excelencia den Servicio y Liderazgo. E aña Leonistico nobo, e club tin hopi reto dilanti, cual enfoke principal lo ta dirigi pa crece den miembrecia di calidad y liderazgo, cu compañeronan cu tin e pasion y compromiso di sirbi nos comunidad. Cumpli cu e programa Leonistico Internacional 2019 – 2020 cu e enfoke special riba e necesidad y demanda local, caminda nos hubentud, nos grandinan y nos medio ambiente ta un prioridad. Cultiva y Desaroya e don di Liderazgo y Hermandad di cada un di nos miembronan. Concientiza y educa miembronan di nos comunidad riba nan responsabilidad pa ta un ciudadano ehemplar.
E presidente nobo Compañero Leon Junior Arends a trece dilanti cu desde añanan 90 ela sera conoci cu e famia Leonistico, formando parti di Leo Club of Aruba y desde e tempo ey como hoben a nace e pasion di ta lider pa sirbi nos comunidad. Su persona a gradici e directiva saliente encabeza pa Compañero Leon Andy Curiël y henter su directiva, pa nan esfuerso y dedicacion na bienestar di nos club y nos comunidad enparticular.
E Presidente a acepta su responsabilidad cu tur seriedad y orguyo y a motiva cada un di su compañeronan pa sinti nan mes orguyoso di ta un di e 1.5 miyon miembro di Lions Club International, e club di servicio mas grandi na mundo. Un oportunidad bunita y unico caminda na momento cu bo bira un miembro di Lions Club, e pasa bira un parti di bo forma di biba.
Gradiciendo cada uno pa nan cooperacion pa haci e anochi uno impresionante y exitoso, e Presidente a anuncia e lema pa e aña nobo “Lidernan sirbiendo cu Pasion y Responsabilidad”, pasobra pa cualkier meta o retonan den bida cu bo tin bo dilanti, ora cu bo hacie cu pasion y cu bo curason, bo tin mas cu mitar di e trabao concretiza y hunto nos lo logra esaki. Nos servicio ta pa ta den comunidad y hunto cu nos comunidad, manera e motto internacional cual ta “WE SERVE!” y pa ‘Aruba One Happy Island Lions Club’ , WE SERVE WITH PASSION!”