L.G.Smith Blvd – Dialuna anochi den careda di 9’or polis a bay na e entrada parti pazuid di Marriott, esta Marriott’s Aruba Surf Club pa un accidente di auto serio.
Informacion cu a drenta tawata papia di un accidente basta fuerte.
Na e sitio polisnan ta bin topa cu un Chevrolet Spark y un Toyota Vitz, den ambos auto tawata tin hende herida.
Mesora polis a pidi pa ambulance.a
A bay over pa cera e caminda, pa asina ambulancenan por a yega mas lihe na unda e accidente a sosode.
Segun nos a compronde, e Chevrolet Spark tawata bayendo direccion nort y a dado momento a lora na su man robes probablemente pa drenta tereno di e hotel, sin duna e Toyota Vitz preferencia.
E ultimo aki tawata bayendo direccion zuid.
E Vitz despues di e impacto a bay para ariba e yerba.
Na yegada di ambulancenan Paramediconan a cuminsa atende cu e heridonan, cu danki Dios no tawata mustra cu nan ta seriamente herida.
Personal di limpiesa di e hotel tambe a sali yuda, debi cu restonan di e autonan a keda benta den entrada di e hotel.
Takelwagen a wordo pidi pa move ambos auto for di e sitio.