Professor Lorentzstraat, Oranjestad: Diaranson algo pasa di 7’or y mey di anochi, un meneer di edad a wordo alcansa pa un auto na e crusada Professor Lorentzstraat cu Emmastraat. Mesora a pidi pa presencia di polis y ambulance na e sitio.
Na yegada enberdad nan ta topa cu un meneer di edad, kende tabata herida drumi riba caminda, aparentemente e meneer lo a haya hopi sla na cabes y tabata sangrando masha hopi mes. Mesora e personal di ambulance a trat’e na e sitio y despues a transporta e meneer cu hopi urgencia pa hospital.
Aparentemente e meneer lo tabata crusando e caminda net na momento cu di pariba tabata biniendo un Kia color cora, maneha pa un dama. E dama chauffeur lo a trata na brake pa asina evita di alcansa e meneer aki cu auto, pero lamentabelmente e no a logra, brake na tempo, riba e caminda a keda un rastro di brake basta largo. E impacto tabata hopi fuerte cu e windshield di e auto a kibra.
Polis a cera e caminda pa mas investigacion.