Oranjestad Aruba: Iglesia Jerusalem Antiguo ta anuncia nan evento cu nan ta
organiza conhuntamente cu Iglesia Los Olivos, Cas di Oracion Savaneta, Tabernacle of David, Emmanuel, Kairos, M.I. Fuente de Vida, Rios de Agua Viva, Cunuco de Dios, GSCC, I.C. Hesus Bo Speranza Nobo, Hesus Biña Nobo, Sin Muros Habitaremos, Odres Nuevos, Nueva Vida Aruba y C.F. Comienzo Nobo ta invita ful pueblo di Aruba pa nan evento di gran importancia pa nos isla di Aruba.
Nan lo tin como invitado Pastor Mariano Riscajche di Almolonga, Guatemala. Pastor M. Riscajche cu ta di Almolonga y cu ta un homber umilde y simpel cu Dios a usa den e gran avivamiento na Guatemala. Almolonga ta reconoci mundialmente pa entre otro e tamaño di verdura cu ta wordo cosecha na e cuidad ey, despues cu un avivamiento spiritual a tuma lugar na e pais ey ora cu Pastor M. Riscajche cu su señora a uni e iglesianan pa un temporada den oracion. Tambe tur e prisonan di e cuidad ey a sera poco poco.
Tin hopi hende rond mundo ta bay na Almolonga pa ta parti di locual Señor ta hacienda y pa wak e milager cu a tuma luga den e tera di e cuidad ey. Aruba tin e gran honor cu e homber di Dios ta desea y ta guía door di Señor pa bin na nos isla pa trece un palabra y uncion di transformacion.
E evento aki lo tuma luga na Y.M.C.A Dakota, entrada ta gratis y lo tuma lugar:
- Diabierna 29 Maart 2019, 7:00 pm.
- Diasabra 30 Maart 2019, 7:00 pm.
- Diadomingo 31 Maart 2019 6:00 pm.
Iglesia Jerusalem Antiguo hunto cu tur e otro iglesianan cu ta participa, ta
extende e invitacion na henter e comunidad di Aruba, pa bishita e evento aki e dianan 29,30 y 31 maart 2019 pa asina hunto nos por ta parti di e transformacion cu Dios lo hasi tambe ariba nos dushi isla di Aruba.