Ponton – Diaranson maduga habitantenan di Ponton y cu ta biba cerca di e supermarket Hua Run a scucha zonidonan fuerte den e area.
Un habitante cu a presencia tur cos a conta cu su persona a kere cu kizas e truck lo tin hende burachi na stuur, pues esey tawata su prome impresion.
Yegando mas cerca ela ripara cu e truck a keda bay dilanti y despues bolbe reverse varios biaha, y a kibra e vitrina panort di e supermarket.
E momento eynan e testigo a realisa cu aki ta trata di algo no bon. Dos homber a sali di e truck, un halto y un cortico.
Ambos tawata tin bandana na cara y tambe Hoodies(Capushon) bisti.
Mirando cu nan a dal varios biaha den e parti panort di e supermarket, nan a baha pa mira si nan por a drenta.
Esey tawata e momento cu e testigo a gritanan, y aki tawata caminda e ladronnan a realisa cu nan a wordo gespot.
Mesora nan a core bay, direccion di unda e getaway car mester tawata, pero aparentemente esey no a yega ainda. E testigo a sigui conta cu un di nan a bolbe y a purba drenta, pero esaki no tawata posibel paso e truck no a logra crea e entrada necesario pa esaki.
E momento si ela core bay bek, unda tawata tin un Jeep wrangler shinishi sin capa wardando nan.
Despues di e esey e Jeep Wrangler a sali direccion rotonde Tanki Flip. Parse cu e Jeep no tawata tin nummer plaat.
Brandweer a wordo pidi door di agentenan, pa motibo cu e truck a keda Rev masha halto mes, sacando hopi huma.
Esaki a pone esnan presenta pensa cu e truck lo por bay cende candela.
Brandweer na yegada a logra stop e truck.
Mirando e incidente serio aki, agentenan na e sitio a notifica recherche y tambe departamento tecnico di polis.
Hua Run Supercenter no ta un supermarket desconoci, pa tipo di incidentenan manera esaki.
Den pasado e supermarket aki tawata den noticia, y pa e mesun sorto di incidentenan manera esun aki.
“Na september 2016, ladronnan a drenta via dak y na un manera estilo Houdini ta bay cu e safe, cu tawata tin rond di 200mil florin aden. Esnan cu a drenta e dia aki tawata sa exactamente unda y cuanto placa tawata tin den e safe. No ta conoci si a detene hende den e robo aki”.
“Na april 2017, tres ladron ta wordo gara momento cu nan a drenta e edificio pa horta, y a hayanan cu caha di placa. E dia ey tawata trata di dos menor di edad y un adulto”.
Awe februari 28 2019, un otro caso espectacular ta tuma luga.
Hua Run Supercenter tin aantrekkingskracht pa ladronnan ?