Home Police Chauffeur di Minister di Husticia a yama polis pa un homber cu...

Chauffeur di Minister di Husticia a yama polis pa un homber cu a pidi pa papia cu Minister Bikker un rato

George Madurostraat – Byronstraat

Diaranson anochi algo prome cu 10:30 p.m, polis a ser pidi na cas di Minister di Husticia Sr Andin Bikker.
Cas di e Minister ta situa net ariba e crusada di George Madurostraat cu Byronstraat.

Segun e prome informe, na e adres di e Minister lo tin un homber haciendo fastioso of lo ta molestia e mandatario.
Den algun minuut patruya di Playa a yega y mey mey caminda nan a papia cu e homber, cu a splicanan su version.

Asina mes despues di a scucha e cabayero su parti nan a ordene pa bay di e sitio.
Loke a cabayero a haci tambe.

Prome cu ela bandona e sitio, nos a puntre kiko a pasa. Polis tambe a keda para na un distancia, observando.

Segun e cabayero lo ta un asunto di Dimas, esta un mucha cu nan lo a detene awe y Sra Hassell di Guarda Nos Costa a bise cu e unico persona cu por para e proceso di deportacion ta e Minister di Husticia.
Wel e cabayero lo a sigui e conseho di Sra Hassell y a bay sinta na e cas di e Minister pa e puntre pa e fabor.

Momento cu ela ripara cu e Minister a yega ela hisa su dede, indicando cu si e por haya su atencion un rato asina.
Esaki lo no a cay bon cerca e Minister y su chauffeur.

E chauffeur a cuminsa bise pa e bay di eynan y cu si e no hacie lo yama polis pe, loke a wordo haci tambe. E cabayero a bise mi no ta bay, paso si mi bay e ora ta mustra cu ta algo malo mi a bin haci.
Mientrastanto e Minister a baha bay paden, sin atende e homber.

Momento cu polis tawata papia cu e cabayero por a mira e Minister paden di su cas loke ta parse su cushina.

Segun e cabayero, si e deportacion no ta tuma luga mainta trempan banda di 7’or elo no a bay eynan y lo a warda durante dia pa a papia cu e Minister.

Lamentablemente e cos a bay otro.