MACUARIMA, ARUBA: Recientemente a yega Aruba un unidad nobo pa Cuerpo Policial Aruba, ta trata aki di Comando Mobil. Cuerpo Policial Aruba tin un bon colaboracion cu Aruba Hospitality & Security Foundation (AH&SF). Pa añanan AH&SF ta percura pa KPA por haya materialnan necesario pa asina sigui brinda Aruba cu un seguridad optimal. E biaha aki a toca turno pa KPA por haya su mesun unidad di Comando Mobil e ta un parti esencial pa maneho di comunicacion di polis. Cu sosten financiero di AH&SF nos a logra esaki. E Comando Mobil aki ta ekipa cu sistema moderno y cu tecnologia avansa cu por comunica y maneha for di cualkier sitio na Aruba. E ta cla caba pa bai den funcion pa asina por brinda Aruba mas seguridad. Tecnologia ta sigui avansa y Cuerpo Policial Aruba ta sigui move den e rumbo aki pa asina por facilita y ekipa e organisacion policial na un otro nivel. “Esaki ta djis un parti cu ainda falta cu tecnologianan moderno cu Cuerpo Policial Aruba mester haya y ta danki cu e sosten di AH&SF y Ministerio di Husticia cu nos por sigui traha hunto pa brinda Aruba y su turismo un seguridad na nivel halto”, ta e palabra di Alto Comisario di Cuerpo Policial Aruba Sr. Andrew Hoo.
AH&SF su meta ta seguridad pa e turismo y e pueblo. AH&SF ta aporta na diferente proyectonan financieramente na Cuerpo Policial Aruba. AH&SF kier brinda KPA ekipo y material pa sigui mantene e seguridad un prioridad. Cuerpo Policial Aruba ta realisa proyectonan cu ta necesario y cu ta importante pa e organisacion y conhuntamente cu AH&SF ta traha riba un strategia pa asina sigui eleva e seguridad den turismo y pa e comunidad. Cu un Comando Mobil como e adkisicion mas nobo esaki ta di suma importancia pa polis por atende diferente eventualidad. “AH&SF ta sumamente contento cu Cuerpo Policial Aruba a haya un Comando Mobil pa asina por sigui brinda mas seguridad cu tecnologia avansa”, tabata e palabranan di Sra Tisa LaSorte Chairperson di Aruba Hospitality & Security Foundation.