Calbas – Diabierna den oranan di merdia polis a bay cu urgencia ariba un caminda den Calbas, unda a sosode un accidente serio entre auto cu brommer.
Prome unidad cu ta yega ta papia di un accidente hopi serio y cu mester di ambulance cu maximo urgencia.
Lamentablemente na yegada di un ambulance y un Rapidresponder ya nada mas por a wordo haci pa e motociclista cu tawata ariba un Harley Davidson.
Tawata trata di un accidente frontal, unda cu ariba un caminda strit e Harley ta dal contra e parti robes dilanti di un auto blanco maneha pa un homber di edad. A resulta cu a laga e homber supla y esaki a sali positivo pa core auto bou influencia.
Asina mes e la wordo transporta pa Hospitaal, posiblemente e tambe lo a ricibi golpi durante e impacto.
Mirando cu e motociclista bou e nomber J. Lopes no tawata duna señal mas di bida dokter Texier tawata necesario pa yega e sitio.
Specialistanan di trafico a presenta pa haci nan investigacion.
Cu e accidente aki Aruba ta conoce su di 6 morto den trafico, ta trata di Jefferson Lopes naci november 1995 pues tawata tin 28 aña.
Jefferson ta un empleado di Compra y tawata ariba su break di trabou.
Nos kier a manda palabranan di condolencia y forsa alabes pa su famia y amistadnan.
