ORANJESTAD – “Mi ta contento cu awe Hulanda y Aruba por anuncia cu nos a yega na un acuerdo”, tabata palabranan di Secretario di Estado Alexandra van Huffelen, despues cu ambos pais a firma e acuerdo financiero. Secretario van Huffelen a indica cu riba e dia aki, Aruba y Hulanda a duna un stap importante pa yega na un “Rijkswet”, cu ta un ley na unda tin
acuerdonan importante pa loke ta trata finansas publico sano di pais Aruba, respetando autonomia di e pais.
El a splica cu e acuerdo aki ta un muestra cu si bo traha hunto, scucha y tuma opinion di otro den consideracion, bo ta yega na resultadonan positivo. Aruba y Hulanda, ya pa basta tempo caba ta den negociacion, pa trata e tema di e interes riba e debe di Covid. Un tema sigur di gran importancia, pa motibo cu un rebaho den e interes di e debe, lo fortifica e presupuesto di pais Aruba, creando oportunidadnan di inversion pa e isla.
Tambe pa crea finansas sano, cu lo resalta den un maneho di gobierno optimal, y desaroyo economico sostenibel. E placa cu Aruba lo “spaar” di no paga interes, por wordo inverti den proyectonan importante pa e pais, manera enseñansa, infrastructura, y/of den e proyecto di transicion energetico.
Secretario di Estado Alexandra van Huffelen, a expresa di ta sumamente contento cu Gobierno di Aruba a acepta e Rijkswet, mirando cu tur e obhetivonan di e presupuesto lo wordo ancra den e Rijkswet, creando asina un sentimento di siguransa entre e dos paisnan.
E acuerdo di awe ta den interes comun di Aruba y Hulanda, pero specialmente den interes di e comunidad di Aruba en general. Awor cu tur dos pais a firma e acuerdo, por sigui traha riba e ley aki. Mientrastanto Aruba lo ta pagando menos interes (5.1%), y unabes e ley wordo aproba den Parlamento, e interes lo baha aun mas (3.4%).
Secretario van Huffelen a sigui splica cu Hulanda tambe ta dispuesto, pa unabes e ley wordo aproba, pa permiti Aruba, durante condicionnan faborabel, obtene prestamonan pa inversion, cu e siguransa cu e maneho financiero ta keda optimal, ya cu ta prestamonan pa tempo largo.
“Mi ta contento cu Aruba a tuma e stap importante aki, na unda cu Aruba y su ciudadanonan por sigui bay dilanti, paso financia di Gobierno sano, ta bon pa tur Arubano” Secretario van Huffelen a termina bisando.