Noticia: Mision Economico Colombia
Aruba y Colombia trahando riba mas cooperacion riba tereno di inversion, turismo y servicio medico
Oranjestad – Minister Sra. mr. Xiomara Ruiz-Maduro ta sigui cu su trabaonan aya na Colombia den e Mision Economico di Reino pa busca oportunidad economico nobo pa nos pais Aruba. Diaranson e mandatario arubano a reuni cu “Ministro de Comercio, Industria y Turismo Sr. Jose Manuel Restrepo Abondano. E reunion a inicia caminda e mandatario colombiano a elogia Aruba y su industria turistico cu ta un ehempel y di cual experiencia Colombia kier siña. Di parti Colombia nan ta desea pa por tin mas cooperacion riba tereno di inversionan den turismo y mehora e conexion entre Aruba y Colombia. Otro punto cu a ser treci dilanti di parti e mandatario Colombiano ta e bon colaboracion riba tereno medico ya cu Aruba ta haci hopi uso di e servicionan medico di colombia.
Di parti Aruba nos Minister di Finansa, Asuntonan Economico y Cultura Sra. mr. Xiomara Ruiz-Maduro a expresa e disponibilidad di Aruba pa comparti nos experiencia riba tereno turistico cu Colombia y ATA lo por hunga un rol primordial den esaki. Ademas Minister Ruiz-Maduro a resalta interes di Aruba pa desaroya e subsector di turismo medico na Aruba cu asistencia di expertonan di Colombia
Aki tambe minister a indica interes pa importa di forma structural productonan agricola di Colombia pa Aruba y a papia di e importancia y beneficio cu esaki tin pa consumidor na Aruba. E posibilidad pa habri e ruta maritimo di transporte di Baranquilla y Cartagena tabata topico di interes di ambos mandatario.
Minister Ruiz-Maduro a trece dilanti cu su colega Minister di Turismo, Salubridad Publico y Deporte Sr. Dangui Oduber lo bishita Colombia pa sigui amplia riba posibilidadnan di turismo medico y ruta di crucero di Aruba y Cartagena.
Ambos ministro Ruiz Maduro y Restrepo ta mira e importancia den industrianan creativo (creative industies) of manera e ta yama na Colombia, Industria Naranja. Esaki ta un di e sectornan cu a wordo identifica pa Aruba y cual mundialmente ta desaroyando rapidamente, esta un “upcoming industry”. E industria aki ta hopi interesante tambe pa hobennan y kier incentiva esaki entre nos hobennan. Na Colombia ta haci uso di incubators pa desaroya e industria aki. Cu esaki Colombia kier fomenta industria naranja, ta creativo y trece e dinamica di negoshi via incubators.
E ministro di Comercio, Industria y Turismo a inicia recientemente un oficina INNPULSA, cual ta un unidad di e Gobierno nacional di Colombia cu ta promove entrepreneurship, innovacion y productividad como as pa desaroyo di empresanan y su competencia na Colombia cual lo ta fuente pa bienestar y progreso di e pais.
Minister Ruiz-Maduro a splica cu e promising sectors di Aruba pa incentiva e diversificacion di economia na Aruba y cu por crea cooperacion y inversion colombiano pa esaki.
Otro tema trata ta e gran oportunidadnan cu tin den cuadro di circular economy entre Aruba y Colombia y cu por genera beneficionan pa ambos pais. Minister Ruiz-Maduro ta mira atras riba un reunion fructifero caminda a toca puntonan di interes mutuo cual ta awor lo sigui traha riba nan y duna e cooperacion pa asina esaki por wordo realiza na beneficio di e comunidad arubano y colombiano.