ORANJESTAD, Recientemente Dr. Horacio E. Oduber Hospital a tene nan di dos “Jubileumviering” p’e aña aki na Renaissance Convention Center. Ey a celebra cu un cantidad di empleado cu a recorda e fecha cu nan a cuminsa traha na Hospital, entre luna di juli te cu december 2019. Tambe a duna danki y gradici coleganan cu ta of a bay cu pensioen entretanto. E dia aki nan a celebra hunto cu famia y coleganan y durante e celebracion a duna coleganan un pin y nan certificado.
Ya pa algun luna nos ta preparando pa e celebracion di hubilario, asina Charlaine Alexander-Huntington, gerente di e Departamento di Comunicacion di Dr. Horacio E. Oduber Hospital a duna di conoce. E grupo di hubilario ta bastante grandi na unda a yega un total di 950 aña di servicio. A invita e hubilarionan, nan departamento y famia pa e gran dia aki pa asina hunto celebra 12.5 aña, 25 aña, 35 aña y 40 aña di servicio na Hospital y sin lubida e gradicimento enorme pa coleganan cu ta baha cu pensioen.
Mas o menos 300 invitado a asisti na e celebracion, cu a inclui empleadonan di tur departamento di Hospital cu ta bin hunto mane un famia pues un tiki di tur skina di hospital.
Charlaine Alexander-Huntington ta gradici tur e hubilarionan pasobra nan ta esunnan cu ta carga Hospital. Nan ta esunnan cu t’ey na cama brindando pashent cuido, dunando e pashentnan cuminda y yudando nan durante nan estadia of esun cu ta haci e testnan of ta contesta telefon. Un danki na nan pa tanto aña di servicio na hospital, pero alabes danki pa brinda tur hende di Aruba tremendo servicio na momento cu mester a pone un pia den Hospital pa cualkier motibo. Boso ta e caranan di nos Hospital.
“Un pabien na nan, danki di curason y si Bo a cumpli 12 aña y mey mi ta spera di mira Bo na 25 aña”, el a duna di conoce. Na e pensionadonan ta yama nan danki tambe, pasobra cada un di boso a aporta cu un korreltje zout na loke Hospital ta awe pa su pashentnan”, asina Charlaine Alexander-Huntington a termina bisando.