Diahuebs mainta Gobierno di Aruba a tene su ceremonia na memoria di e dos Angelitonan di Aruba kende na un forma cruel a fayece, un suceso cu a sacudi henter pueblo di Aruba.
E morto di e dos muchanan aki a marca e pauta di e Gobernacion aki, cu apenas 1 siman na mando, ta wordo confronta cu un suceso asina tristo. Pero corectamente manera Glenbert Croes a expresa durante e ceremonia, cu no solamente e suceso aki a marca e paso y accion di Gobierno pa e aña cu a pasa pero tambe pa e añanan venidero unda cu ta biba y reina e compromiso pa sigura cu locual cu a pasa cu Rishandroh y Roshendrick no ripiti mas.
“Ta momento pa nos puntra nos mes cu si despues di un aña nos ta diferente como Pais, cu si nos ta haciendo cosnan diferente pa impedi cu casonan manera di Rishandroh cu Roshendrick bolbe ripiti. Ami lo kier kere cu si. Inmediatamente despues di e suceso aki, Gobierno di Aruba a yama tur partner den e sector social na mesa cu a desemboca den un Crisis Plan Social pa nos bay contra-ataca e situacion social dificil cu tabata y ta hirbiendo den hopi hogar, hopi districto, full rond di Aruba. Nos a dicidi cu nos no ta bay para man crusa cu nos ta bay actua pero pa bo actua bo mester pone fondonan disponibel cu a bira posibel cu e apoyo di Parlamento di Aruba pa nos contra-ataca e problemanan social cu a bin ta ataca nos pais. Hopi kier a bira cara pa un realidad cu a keda herbe. Y ora a pasa e caso di Rishandroh cu Roshendrick, hopi hende den sector social a bisa: Glenbert nos tabata en espera di cu algo asina lo pasa pronto pasobra bo tabata weit’e cu si dado momento no tuma accion riba e problemanan cu tabata surgiendo, un bom lo explota”, tabata palabranan di Minister Glenbert Croes kende a continua bisando: “Nos tin un compromiso como Pais, un deber como comunidad pa nos sigura cu e morto di Rishandroh y Roshendrick no ta envano. Nan a paga un prijs demasiado halto pa a lanta nos comunidad for di e soño cu kisas nos tabata aden. Nos tur conoce famianan, nos tur conoce amistadnan, nos tur conoce bisiñanan cu ta pasando den situacionnan di abuso y violencia sumamente dificil. Obviamente e crisis social ta real. E no ta algo inventa. Y p’esey mes awe cu nos ta honra Rishandroh cu Roshendrick cu e matanan cu nos ta bay planta, e di tres mata ta pa tur e otro victimanan di abuso y violencia, nos ta planta e matanan aki pa mantene e promesa bibo cu nos lo keda traha dia aden dia afo pa nos muchanan no mester paga e prijs duro cu e dos Angelitonan aki a paga”.
E mandatario durante su disertacion, ademas di a gradici e organizacion di e tributo simbolico aki, como tambe tur fundacion- y instancianan trahando den e mundo social y e propio Departamento di Asunto Social, a gradici un persona special cu den e trayectoria aki a sa di duna su apoyo absoluto kende ta nos Minister President kende a para firme pa no laga ningun instancia mishi cu e fondonan di e Crisis Plan Social cu ta unicamente y primordialente dedica na su ehecucion.
E mandatario a desea henter e famia y henter comunidad hopi forsa y a haci e compromiso di lo haci tur lo posibel y imposibel pa sigura cu nos muchanan, nos hobennan, nos famianan, nos grandinan, tur esunnan cu ta vulnerabel den nos comunidad, pa nan por lanta den un Aruba cu nos por ta orguyoso di dje. “Boso por ta sigur cu tur loke cu ta humanamene posibel, hasta imposibel, nos lo sigui haci pa ningun mucha aki na Aruba mester paga e prijs cu Rishandroh y Roshendrick lamentablemente a paga”, e mandatario a expresa.
“Un cos mi kier pa boso sa: Nos lo percura mantene nan memoria biba. Nan ta Angelitonan cu mester keda nos strea, nos luz cu ta keda briya riba nos pa guia nos riba e caminda aki, pa e compromiso aki keda di nos tur y pa semper “, tabata e compromiso cu a clausura e discurso di Minister Glenbert Croes.